Tulo gipatay sa Lapu-Lapu ug Talisay

CEBU, Philippines - Duha ka tawo ang gipangpatay sa managlahi nga dapit sa Dakbayan sa Lapu-Lapu samtang usa ka negosyante nga Indian national ang gipatay sab sa Dakbayan sa Talisay ug ang kapolisan wala pa masayod kinsa ang mga kriminal.

Una nga gipusil sa tawo nga nagsakay og motorsiklo mao si Danny Oyao Bonghanoy, 54, nagpuyo sa Barangay Agus, Dakbayan sa Lapu-Lapu ug ang ikaduha nga biktima sa pagpamusil didto sa Barangay Pajac kagahapon sa buntag mao si Michael Angelo Nuñez, 37, taga Camella Homes.

Si Police Senior Inspector Alden Zambrano sa homicide section sa Lapu-Lapu City Police Office (LLCPO) miingon nga si Bonghanoy ug ang iyang higala nga si Renato Amores naglakaw sa dalan sa Barangay Agus diha nga ang biktima gipusil.

Ang tawo nga nag-backride sa motor maoy mipusil kang Bonghanoy ug naigo kini sa liog, ug nahagba sa yuta ang biktima. Wala matagbaw, nanaog sa motorsiklo ang gunman ug gitiwasan pagpusil si Bonghanoy.

Samtang ang laing biktima nga si Nuñez nagpalit lang og crispy chicken sa usa ka tindahan sa Barangay Pajac dihang ang wala hiilhing mga lalaki nga nagsakay gihapon og motorsiklo mipusil kaniya.

Sa laing bahin, gipatay usab sa wala hiilhing kriminal ang usa ka Indian national sulod sa iyang apartment sa Barangay Tabunok, Dakbayan sa Talisay kaniadtong Martes sa buntag.

Si SPO2 Yvonne Ilustrisimo sa Talisay City Police Station miingon nga gisusi pa karon sa kapolisan kun ang biktima nga si Balvir Singh, 47, minyo, gitulis ba kay naukadyang ang iyang kagamitan sa balay.

Nabulit sa dugo ang ulo sa biktima ug makita nga adunay agi sa pagbunal nga gituohang maoy nakaingon sa iyang kamatayon. Ang asawa sa biktima wala dayon maestorya sa kapolisan kay didto ra kini sa buwag niya nga kuwarto.

Nagduda hinoon ang mga polis nga dili maayo og relasyon ang managtiayon tungod kay wala man sila mag-uban sa usa ka kwarto. Nahibaw-an nga ang Indian national nalambigit sa negosyo nga pagpatanto og kuwarta. Camille Pateres, Romeo Limpangog, Gabriel Bonjoc ug Hazel Secop (BANAT NEWS)