OPSI mopasiugda’g dagkung mga kalihukan karong marso

CEBU, Philippines - Higpit nga iskedyul ang nakalinyada sa Omega Pro Sports International karong bulan sa Marso nga gilangkoban og duha ka boxing promotion inubanan sa regional title fight sa usa sa mga boksidor niini gawas sa nasud.

Karong Marso 8, ang OPSI mopasiugda og ‘Rumble sa Masbate’, nga maoy pasiuna nilang dalit karong tuiga diin sila si Jhaleel Payao ug Jason Tinampay magsangka alang sa Philippine Boxing Federation bantamweight title.

Human sa Masbate, diin si Jimboy Jaya (9-3-2, 7KOs) makigsangka  ni Ken Jordan (4-0, 4KOs), ang OPSI mopunting sa ilang atensiyon didto sa Hong Kong diin ang ilang batos nga si Kenny Demecillo makigpinaksitay  ni Mark Anthony Geraldo alang sa WBO Oriental bantamweight title.

Usa ka semana human mangindahay si Demecillo sa langyaw’ng lapyahan, ang OPSI mopasiugda sa  ikaupat nga edisyon sa “Who’s Next? :Pro Boxing Series” diin ang wa’y pildeng si Jhack Tepora ug Christian Araneta makigharong batok sa mga Indon nga kontra karong Marso 18 diha sa Waterfront Cebu City Hotel and Casino.

Si Tepora, ang labing sanag nga bitoon sa Omega stable, wa’y pilde sa 19 ka away uban ang 14KOs ug siya maoy kasamtangang WBO junior featherweight champion. Gitakda siya nga modepensa batok ni Yon Armed.

Samtang si Araneta, nga wala pa sa’y  pilde sa 13 ka away uban ang 11KOs, makigharong ni Demsi Manufoe alang sa bakanteng WBO Oriental junior flyweight title. (BANAT NEWS)