EDITORYAL - Usa ka lata nga ulod

Human sa anti-illegal drugs operation sa kapolisan nga may pipila ka polis ang nasakpang nalambigit sa sindikato, karon ang anti-illegal gambling na usab ang gipatutokan kanila ni Presidente Duterte.

Nikuyanap na pag-ayo sa kabarangayan kining mga nagkalainlaing sugalan nga daw wa na’y nibadlong bisan og nasayod man unta ang tanan nga kini usa gyud ka ilegal. Gikan sa baraha, mahjong, tigbakayan, masiao, ilegal swertres, video karera, moli-moli, jueteng, ug ang bag-o nga gitawag og illegal small town lotteries nga gikopya gikan sa legal nga lottery sa Philippine Charity Sweepstakes Office.

Bugtong legal nga sugal sa Pilipinas mao ra ang PCSO ug mga Casinos nga gi-operate sa Philippine Amusement and Gaming Corporation (PAGCOR) nga adunay bahin sa kita, ug ang uban mahipunta sa pagtukod og mga public schools, public hospitals ug uban pa nga programa alang sa mga kabus.

Apan nakigkompetensya karon kining mga illegal lotto outlets nga daw mga uhong nga nanurok sa mga suok-suok sa kabarangayan ug wala gyud pangdakpa sa mga otoridad. Alkanse ang gobiyerno niini kay wa may masulod sa kaban sa kagamhanan, samtang ang mga operators ug protectors ra ang nagpadato.

Dili kalikayan nga makapangutana ang katawhan kun may mga opisyal ba sa kabarangayan, o taas nga opisyal sa gobiyerno nga nagprotiher kanila. Apan ang kataw-anan mao nga pirme lang madungog sa katawhan ang panawagan sa gobiyerno nga “kooperasyon” ug “pagpakabana,” isumbong dayon kun may mga ilegal nga nanghitabo sa ilang palibot.

Apan makapila na ba nga niabag ang mga tawo nga wala nila aksyoni? Dili ba sila maoy angay unta nga mohimo’g aktibong pagpatuman sa balaod? Kining mga anaa sa gobiyerno maoy hinungdan ngano nga dili na lang usab magpakabana ang mga tawo kay kurakot ang mga otoridad ug wa’y gibuhat batok niini.

Karon, basin sama sa kampanya kontra illegal drugs, may bag-ong lata na usab nga puno sa ulod nga makuykoyan si Duterte  gikan sa illegal gambling operations.