Wala magkasabot

Gipahunong ni Presidente Rodrigo Duterte ang nagpadayon nga sabot-sabot sa kalinaw tali sa gobiyerno ug mga sakop sa Partido Komunista sa Pilipinas (PKP) nga gipahigayon didto sa gawas sa nasud.

Ang presidente naglagot human mangataki ug nanagit og tawo ang armadong grupo sa PKP nga mao ang New People’s Army sa mga sundalo sa gobiyerno. Gikonsiderar na usab ni Presidente Duterte ang nahisgutang grupo nga terorista ug walay kalainan sa Abu Sayyaf.

Sa akong pagsabot, nahugno ang sabot-sabot sa kalinaw tali sa gobiyerno ug PKP tungod kay ang mga nagsabot-sabot wala gayud diay laraw nga magkasabot. Ang mga rebelde nangayo sa gobiyerno og mga dili puyde nga ikahatag niini mao nga makaingon ka nga dili sila sinsero sa ilang pagpakigsabot og kalinaw.

Gusto sa mga rebelde nga buhian ang tanan nilang kauban nga nabalhug sa prisohan, apan dili kini puyde nga mahatag sa gobiyerno kay silang tanan nag-atubang og mga kasong kriminal sama sa pagpatay, pagpangdagit, pagpangilkil ug uban pa. Hinuon, gipabuhian sa Presidente ang mga tag-as nga opisyal sa rebelding grupo.

Wa ko magdahom nga mahugno ang sabot sa kalinaw kay sayod kita nga duol sa kasing-kasing sa mga rebeldeng komunista si Presidente Duterte, ug gani adunay daghan nga sakop sa iyang gabinete nga suod sa mga opisyal sa PKP.

Karon nga gikonsiderar na ni Presidente Duterte nga terorista ang mga rebeldeng NPA ug ang partido komunista sa nasud, unsa may mahitabo sa mga opisyal niini nga anaa karon nagtrabaho sa atong gobiyerno?

Manglayas ba sila sa gobiyerno ni Duterte? Kun ako lang, agi og delikadeza, mas maayong manglayas na sila sa gobiyerno ni Duterte kay wala sila makatabang niini. Ang tumong ug tuyo sa gobiyerno nganong gihatagan sila og posisyon aron makatabang sila ug ipakita ngadto sa ilang grupo nga mas maayo ang panaghiusa, apan napakyas sila.