Sirao Flower Garden dili una pasuroyan

CEBU, Philippines - Delikado karon ang sitwasyon sa Barangay Sirao ilabi na sa nabantog nga Sirao Flower Garden human sa nahitabong pagdahili sa yuta sa maong dapit nga miresulta sa pagkaguba sa dalan ug pangliki sa yuta.

Nunot niini, giawhag ni Cebu City Councilor Jerry Guardo kinsa maoy chairman sa Committee on Infrastructure and Urban Planning, ang Department of Tourism ug ang Cebu City Tourism Commission nga kun mahimo, did-an una ang mga lokal ug langyaw nga turista nga moadto sa Sirao Flower Garden.

Kini alang na usab sa ilang kaluwasan human nakita sa konsehal atol sa iyang pagbisita sa dapit nga adunay mga pagpangliki sa kayutaan ug kuyaw nga modahili bisan unsang orasa.

 Gihulagway ni Konsehal Guardo nga dili pa stable ang yuta sa dapit ug nagsige pa ang uwan hinungdan nga mihumok ang yuta ug nidahili.

Giawhag usab sa konsehal ang barangay officials sa siyudad sa pag-ila sa mga dapit nga landslide ug flashflood prone areas aron madeklarar kini nga danger zone ug hingpit nga madili ang pagparking ug tukuran og istraktura sa maong mga dapit.Gipasabot ni Guardo nga temporaryo lang ang pagdili sa pag-adto sa flower garden ug paabuton lang nga makapagawas og rekomendasyon ang Mines and Geosciences  Bureau human sa ilang pagpahigayon og pakisusi sa dapit.

Alang niya, mas maayo nga  adunay mga itanom ang Department of Agriculture nga makatabang aron pagpugong sa soil erosion ug landslide.

 Nasayran nga adunay road closure paingon sa Brgy. Sirao gumikan sa kadaut sa dalan sa dapit. – BANAT NEWS