15 landslides niigo sa siyudad

CEBU, Philippines -  Nitala og 15 ka landslide sa siyudad sa Sugbo ang Cebu City Disaster Risk Reduction and Management Office resulta sa mga nasinating pag-uwan sulod na sa pipila ka adlaw. Nagkanayon ang pangulo sa CCDRRMO, Nagiel Bañacia, nga ang maong landslides nahitabo sa Barangay Mabini diin unom ka pagdahili sa yuta ang nahitabo, tulo sa Adlaon ug uban nahitabo sa Sudlon 1, Pulangbato, Busay, Budlaan, Agsungot ug Malubog.

Sagad sa mga pagdahili nakababag sa kadalanan hinoon walay naangol ug kabalayan nga naapektuhan.

Ang labing dako nga pagdahili sa yuta nahitabo sa Sitio Tanay, Pulangbato tungod kay nagsige og lihok ang yuta gumikan sa quarry operation sa usa ka kontraktor sa ibabaw nga bahin.

Hinoon ang landslide nga nahitabo sa Mabini wala ray problema sanglit ang mga 4-wheel vehicles mahimo ra nga makaagi.

Ang mga pagdahili sa yuta nahitabo sukad Martes ug uban niini nahuman na ang clearing operations. (BANAT NEWS)