Hukom na nagpalaya kay Reyes magreretiro ng maaga

MANILA, Philippines — Nakatakdang magretiro sa susunod na buwan ang hukom ng Court of Appeals (CA) na nagsulat ng hatol kay dating
Palawan governor Joel Reyes na mastermind umano sa pagpatay kay environmentalist at broadcaster Gerry Ortega sa Puerto Princesa noong 2011.

Ayon ulat ng STAR, sinabi ng insider na sa susunod na buwan na magreretiro si Associate Justice Normandie Pizarro na dapat sana ay sa susunod na taon pa kasabay ng kaniyang mandatory retirement sa edad na 70.

“He already informed his coterminous staff that he will retire next month and also advised them to start looking for new jobs now,” sabi ng insider na tumangging magpakilala.

Si Pizarro ang nagsulat ng hatol ng 11th Division na nagpalaya kay Reyes at nagbasura ng kasong murder sa Puerto Princesa regional trial court.

Associate Justice Normandie Pizarro

Pinaboran ng korte ang petisyon ni Reyes na nagsabing mahina ang ebidensya laban sa kaniya upang mapatunayang sangkot nga siya sa pagpatay kay Ortega.

Kinuwestyon ng appellate court ang hatol ng RTC na nagbase lamang umano sa testimonya ng dating security escort ni Reyes.

Inamin ng escort ng dating gobernador na umarkila ng gunman si Reyes upang ipapatay si Ortega.

Nauwi ang botohan ng CA sa, 3-2, kung saan kasamang pumanig ni Pizarro sina Danton Bueser at Victoria Paredes, habang nag-dissent sina Associate Justices Maria Filemona Singh at Marie Christine Azcarraga-Jacob.

“Call it a second chance afforded him by God or a lucky three-point play for him, to use a common street lingo, or a miracle in his favor, (Reyes) must by all means be exonerated from the charge,” saad ni Pizarro sa desisyon.

Si Pizarro rin ang nagsulat ng hatol na nag-abswelto sa umano’y pork barrel scam mastermind Janet Lim-Napoles para sa kasong serious illegal detention.

Siya rin ang nagsulat ng kautusan na nagbabasura sa compensation claim ng nasa 10,000 human rights victima noong martial law ni dating Pangulo Ferdinand Marcos.