Usec. Chavez nagbitiw dahil sa aberya sa MRT

MANILA, Philippines — Naghain ng irrevocable resignation si Department of Transportation (DOTr) Undersecretary for Rails Cesar Chavez kahapon, sa kainitan ng isyu kung ligtas pa bang sakyan ang pinamamahalaan nilang MRT dahil na rin sa halos araw-araw na pagkaka-aberya nito.

Sa kanyang resignation letter na may petsang Nobyembre 23, 2017, sinabi ni Chavez na nagpasya siyang bumaba sa pwesto upang mabigyan ng pagkakataon sina Pangulong Duterte at Transportation Secretary Arthur Tugade na makahanap ng taong mas kwalipikado para gampanan ang kaniyang tungkulin at responsibilidad.

Inamin ni Chavez na ang mga nagdaang sitwasyon ng MRT ang nagtulak sa kanya upang bumaba na sa pwesto.

Giit niya, hindi maaaring palagi na lamang naninisi sa nakaraan dahil ang mga kaganapan ngayon sa MRT ay responsibilidad na nila.

“I hope the President understands that in the light of recent events involving the MRT3 System, simple sense of delicadeza which I have adhered to throughout my professional life gives me no choice but to resign from my said position,” aniya pa.

Samantala, nilinaw naman kahapon ni Tugade na hindi niya pinagbitiw sa tungkulin si Chavez.

Ayon kay Tugade, walang dahilan upang pababain niya sa posisyon si Chavez dahil buo pa rin ang kanyang tiwala sa kakayahan nito.

Aminado rin ang kalihim na maging siya ay nagulat sa ginagawang paghahain ng irrevocable resignation ni Chavez, na effective immediately pa.