Utos na itago ang mga palaboy, pinabulaanan ng DSWD
MANILA, Philippines — Itinanggi ng Department of Social Welfare and Development (DSWD) na inutusan nila ang mga “palaboy” o “street dwellers” sa lansangan na magtago habang ginaganap ang 31st ASEAN meetings.
Sinabi ni DSWD Officer in Charge Undersecretarty Emmanuel Leyco, na hindi nila ipinag-utos na magtago ang mga palaboy sa lansangan.
Giit ni Leyco, bagama’t hindi sapat ang programa ng DSWD para sa mga street dwellers ay hindi sila uutusang magtago sa halip ay patuloy umano na gagawa ng paraan ang kagawaran na mas mapabuti ang kanilang programa para sa mga palaboy.
Ang pahayag ni Leyco ay kasunod sa akusasyon ng mga palaboy sa Maynila na sinabihan silang magtago habang ginaganap ang ASEAN summit kung ayaw nilang mapaalis doon ng social workers.
Matatandaan na noong 2015, nabatikos din si dating DSWD Sec. Dinky Soliman dahil sa umano’y puwersahang pagtatago sa mga street dwellers sa isang resort sa Batangas bago dumating sa bansa si Pope Francis para sa Papal visit.
Pinabulaanan din ni Soliman ang alegasyon at sinabi na ang ahensiya ay tumutulong sa mga street dwellers bago ang pagbisita ng Santo Papa.
- Latest
