Mga batan-on nag-rally sa Santa Fe gidepensahan

CEBU, Philippines - Walay nakitang child abuse ang chairman sa Commission on Youth sa Archdiocese of Cebu sa pag-apil sa mga batan-on sa Lungsod sa Santa Fe sa prayer rally nga gipasiugdahan ni Fr. Roy Bucag batok sa Music Isla Festival.

Matud ni Fr. Mark Rommel Barneso, chairman sa COY, nga ang pag-apil sa mga batan-on ilabi na og sakop sa Parish Youth Coordinating Council ilang obligasyon ang pagtubag sa mga social issue ilabi na may kalabutan sa pagtuo.

Si Barneso niawhag sa kabatan-onan nga dili mahadlok sa mga hulga tungod kay kung magpaubos sila sa kahadlok sama ra nagpadala sila sa dautan.

Awhag ni Barneso sa kabatan-onan nga barugan ang unsay sakto ug lakip ang gitudlo sa Dios.

Subling gipahimug-atan ni Barneso nga ang mga batan-on adunay katungod nga mopadayag hinungdan nga iyang ilakip sila sa iyang pag-ampo.

Tinguha usab ni Barneso nga kuyog sa mga kabatan-onan nga mopaguwa usab og ilang baruganan. (BANAT NEWS)