Sunshine napikon sa manlalait

Halatang medyo napikon, pero siguro nga hindi na dapat pinapatulan ni Sunshine Dizon ang kagaya ng isang basher na nagsabing ang kanyang serye ay walang kuwenta. Natural lang naman sa mga tao iyong magkaroon ng iba’t ibang personal na opinion sa mga bagay-bagay, pero siguro nga ang pinakamagandang argument diyan ay “how do you argue with success”?

Talagang matagumpay nga ang kanyang serye, at mataas ang ratings noon kaya nga hinabaan pa iyon, pumatay ng isang show para magtuluy-tuloy ng anim na araw.

Iyong ibang serye, talagang five days lang. Kahit na ano pa ang sabihin ng mga tao, the fact na nangyari ngang six days na sila, ano pa ba ang kahulugan noon?

At saka sa totoo lang, dahil sa serye ay tumaas nang husto ang popularidad ni Sunshine. Nagkaroon ng better leverage si Gabby Concepcion. Mas napansin din naman si Mike Tan na kahit na supporting lamang ang role ay napag-uusapan. Iyong serye nila, hindi lang mataas ang ratings, napataas pa rin ang popularidad ng kanilang stars.

Pero sa kabila noon, tiyak na may mga nagsasalitang hindi magaganda.

Isang magandang example rin iyong mga pelikula. Nagkaisa iyong mga baguhan sa industriya na nagsabing walang kuwenta ang mga pelikula nina Vic Sotto at Vice Ganda na isinasali sa film festival. Inilaglag nila iyong mga pelikulang iyon. In the end ano ang nangyari? Hindi ba mas malaki pa ang kinita ng bawa’t isang pelikulang iyon kaysa sa lahat ng pelikula ng festival?

Hindi mo puwedeng diktahan ang mga tao kung ano ang panonoorin nila at hindi. Hindi mo rin masasabing mas maganda ang ginawa mo kaysa sa iba. In the end, ang publiko naman talaga ang hahatol kung gusto ba nila o hindi ang ginawa mo. Kung gusto nila iyan, mataas ang ratings. Kung natuwa sila sa pelikula mo, tiyak na kikita sa takilya.

Ano mang ganda ang sabihin nila, kung flop din naman, wala kuwento.

Vina kinalimutan na ang akting!

Pinanonood namin iyong Encantadia noong isang gabi nang naalala namin iyong nakita naming pictorial ni Vina Morales sa isang beach. Ang pumasok agad sa isip namin, siguro kung iyong role ni Avria ay ginampanan ni Vina, mas magiging malakas pa ang dating.

Kasi kung titingnan mo, nasa kanya iyong katawang sexy talaga. Tapos maamo ang kanyang mukha na akala mo hindi gagawa ng kalokohan, pero evil iyong character. Isa pa, hindi naman maikakailang noong kanyang panahon ay napakarami ring fans ni Vina. Siguro nga lang nanlamig ang mga iyon dahil hindi siya masyadong visible.

Masyado kasi siyang concentrated sa pagkanta. 

Female star laging nakadikit sa mayayaman

Halos gabi-gabi ay nakikita ang isang female star sa isang “misteryosong coffee shop” sa Makati. Mukhang marami siyang “mayayamang friends” na madalas niyang kausap at naghahatid sa kanya pauwi matapos ang usapan sa “misteryosong coffee shop”. Ano nga kaya ang “misteryo” ng female star na ito?