Gikawot nga deep well gipahunong

CEBU, Philippines - Gipahunong ni Mandaue City Mayor Luigi Quisumbing ang gipahigayong pagkawot og deep well sa usa ka subdivision sa Barangay Casuntingan tungod sa kapakyas sa pagbaton niini og permit.

Ang kamandoan ni Mayor Quisumbing iyang gipadangat ngadto sa mga opisyal ug sakop sa board of directors sa Greenhills Subdivision Homeowners Association Inc., nga nagbase sa nahisgutang barangay.

Gibase ni Quisumbing ang iyang kamandoan sa inspection report nga gihimo sa engineering office ug city legal office nga nagrekomendar sa paghimo sa maong lakang.

Nunot niini, ang mayor mipahibalo ngadto sa nahisgutang asosasyon nga ang iyang buhatan mihatag og lima ka adlaw nga Cease and Desist order alang sa pagpadayon sa ilang  deep well drilling activity apil na ang pagbutang og mga koral.

Sa nasayran, ang Mandaue City Engineering Office miluwat og notice of illegal drilling batok sa mga opisyal sa maong subdivision.

Samtang ang Mandaue City Legal Office mipadayag nga ang issuance of drilling permits, kasamtangang gipugngan sa kagamhanan pinaagi sa City Ordinance No. 10-2007-403, nga nagsilbing preventive measure sa mga hulga sa contamination ug salt water intrusion sa maong dapit. (BANAT NEWS)