Teleperformance, Accenture naka-una sa E-League semis
CEBU, Philippines - Ang Teleperformance All-Stars ug Accenture Sharks mipakgang sa tagsa-tagsa nila ka mga kontra aron pagtikang ngadto sa usa na lang ka daog aron sila maoy mag-abot sa kampiyonato sa Elite Classic sa 12th CSCC E-League men's basketball tournament niadtong Sabado didto sa City Sports Club-Cebu gym.
Sama sab ang dalan nga gibaktas sa Supportsave Dragons ug Tech Mahindra Tech Mighties sa Evo League.
Sila si Marcos Jungoy III ug Kevin Clark Navaja parehong mi-iskor og 11 samtang si James Lester Navaja midugang og 10 alang sa All-Stars nga naka-eskapo batok sa Lexmark Stallions, 64-60, samtang sila si Junas Marion Misa ug Ryan Edward Llanos nagkumboya og 37 puntos, pito ka assists, unom ka rebounds ug lima ka steals alang sa Sharks nga mipakurat sa defending champion Convergys Converters, 62-60.
Gumikan niini, ang All-Stars ug Sharks nanginahanglan na lang og usa ka daog aron sila mo-abante sa finals ingon man ang Dragons ug Tech Mighties sa Evo League.
Si Niño Belande mitali og 21 puntos, lima ka rebounds, lima ka steals ug tulo ka assists alang sa Dragons nga mipiog sa Dynnino Raptors, 62-50, samtang si EJ Saavedra miratsada og 20 puntos, 11 ka rebounds, lima ka assists ug upat ka steals aron pangulohan ang Tech Mighties ngadto sa 69-66 nga kadaogan batok sa QBE Generals. (FREEMAN)
- Latest