Barangay at SK elections idadaos na sa 2017
Mayorya ng Kamara nagkasundo
MANILA, Philippines – Pumabor ang mayorya sa Kamara de Representantes sa pagpapaliban ng Barangay at Sangguniang Kabataan (SK) elections sa susunod na taon.
Sa ginanap na caucus ng super majority sa Kamara, napagkasunduan nila na sa halip na sa Oktubre 31, 2016 idaos ang halalan ng Brgy at SK ay ililipat ito sa ikaapat na Lunes ng Oktubre ng taong 2017.
Dahil dito, inihain na sa Kamara ang panukala na nagpapaliban sa Brgy at SK elections at dahil sa urgency ay magiging mabilis ang proseso nito .
Paliwanag ni House Majority leader Rodolfo Farinas, sa Lunes ay magkakaroon na ng meeting ang Committee on Suffrage na pinamumunuan ni Cibac partylist Rep. Sherwin Tugna upang makapaglabas ng substitute bill para pagsasasamahin ang lahat ng panukala na nauna na ring inihain para sa pagpapaliban ng eleksyon.
Dahil dito, magkakaroon ng concurring bill at saka ito irereport sa Lunes o Martes para sa ikalawang pagbasa kung saan dito magkakaroon ng amendments at debates at saka isasalang sa third at final reading sa Setyembre 12 .
Iginiit ni Farinas, hindi na magkakaroon ng bicameral conference committee sa pagitan ng Senado at Kamara at papipirmahan na lamang ang panukala kay Pangulong Duterte upang ganap na maging batas.
Nilinaw pa ng majority leader na ang Brgy at SK election postponement lamang ang kanilang tinututukan sa ngayon at hindi pa ang sinasabing pagpapa-abolish sa posisyon ng mga kagawad.
Nabatid na inihinto na kahapon ng Commission on Elections (Comelec) ang printing ng mga balota.
- Latest
