Pabuya vs illegal recruiter inilaan ng DOLE

MANILA, Philippines – Malaki ang posibilidad na masugpo na ang illegal recruitment sa bansa matapos magpalabas ng kautusan ang  Department of Labor and Employment (DOLE) sa pagbibigay ng pabuya sa sinumang makakapagturo o makatutulong sa pag-aresto sa mga illegal recruiter. 

Ayon kay Labor Secretary Silvestre Bello, makakatanggap ng P50,000 cash reward ang mga concerned citizen na magsusumbong tungkol sa nagaganap na illegal recruitment na hahantong sa pagkakadakip sa mga illegal recruiter.

Layunin umano ng pabuya na mas mahikayat ang mamamayan na tumulong sa mga awtoridad sa pagsugpo sa illegal recruitment. Sinabi ni Bello na manggagaling ang pabuya mula sa samahan ng mga pribadong recruitment agency.

Maaari umanong simulan ng publiko ang pagbibigay ng impormasyon sa oras na maianunsyo na ang 24/7 hotline ng DOLE.

Kamakalawa ay inianunsyo ng DOLE na maglalagay sila 24/7 hotline call services sa mga sakop nitong ahensya at mga regional office sa buong bansa.