251 Kongresista bomoto: Alvarez, House Speaker na
MANILA, Philippines - Pormal nang naihalal ng mga kongresista bilang House Speaker ng Mababang Kapulungan ng Kongreso si Davao del Norte Rep. Pantaleon “Bebot” Alvarez sa pagbubukas ng 17th Congress kahapon.
Sa pamamagitan ng nominal voting, nagwagi si Alvarez sa botong 251 bilang House Speaker, laban kina Quezon Rep. Danilo Suarez, 7 boto at Ifugao Rep. Teddy Baguilat, 8 boto samantalang 21 kongresista ang nag-abstain na halos lahat ay mula sa Partylist.
Sa unang araw ng sesyon para sa first regular session ng Kamara de Representantes, 285 mula sa 292 kongresista ang dumalo kung saan 107 dito ay mga neophyte.
Dakong alas-10 ng umaga nang magbukas ang sesyon at matapos ideklara ang quorum, inumpisahan ang nominasyon para sa House Speaker ni Ilocos Norte Rep. Rodolfo Fariñas.
Mismong si dating House Speaker Feliciano Belmonte ang nag-nominate kay Alvarez bilang susunod na Speaker at na-nominate din ang kalaban nitong sina Quezon Suarez at Baguilat.
Matapos manumpa ni Alvarez, itinalaga na rin na bagong House Majority Leader ay si Ilocos Norte Rep. Rodolfo Fariñas, habang ang mga Deputy Speakers ay sina Reps. Eric Singson (PDP-Laban), Mercedes Alvarez (NPC), Fredenil Castro (NUP), Raneo Abu (Nacionalista Party) at Miro Quimbo (Liberal Party). Ang Deputy Majority Leaders naman ay sina Reps. Sherwin Tugna (Cibac partylist) at Juan Pablo Bondoc (4th district Pampanga).
Si Cesar Pareja naman ang bagong House Secretary General habang si Roland Detabali ang House Sgt at Arms.
Bago ang pagtatalaga sa mga naturang House officials, nanumpa ang mga miyembro ng 17th Congress.
Bigo namang mapagbotohan kung sino ang magiging lider ng minorya.
- Latest
