Makupad na holdaper, timbog
MANILA, Philippines - Timbog ang isang makupad na holdaper matapos holdapin ang isang promodizer sa loob ng isang pampasaherong bus sa Balintawak, Quezon City kamakalawa ng gabi.
Kinilala ang suspek na si Richard Aquino, 18, binata ng 1371 Gana Compound, Brgy. Unang Sigaw, Balintawak, QC.
Nakatakas naman ang dalawang kasamahan ng suspek na sina Dave Aguilar at Jerome.
Ipinagharap ng reklamo ang mga suspek ng complainant na si Maricris Bonifacio, 21, promodiser ng 1054 D. Danleon St., Liwanag St. Tondo, Manila.
Sinabi ni SPO2 Edwin dela Cruz ng QC Police District station 3 Talipapa, naganap ang insidente sa loob ng pampasaherong bus sa harap ng Chowking sa may Bgy. Unang Sigaw, Balintawak.
Sinasabing sakay ang biktima ng bus nang dikitan ito ng mga suspek at tutukan ng patalim sabay deklara ng holdap.
Nilimas ang mamahaling cellphone ng biktima na Samsung na nagkakahalaga ng P14,000 at agad na bumaba sa bus ang mga holdaper.
Nagreklamo naman ang biktima sa barangay at sa mga pulis sa lugar na agad nagsagawa ng follow-up operation dahilan para madakip ang suspek na si Aquino habang hawak pa ang cellphone ng biktima. (Angie dela Cruz)
- Latest
