EDITORYAL – Namenusan ba ang drugas?

Samtang nagkadugay ug nagkadaghan ang mga nangamatay, nadakpan ug nitahan sukad sa pagsugod sa Oplan Tokhang ug Oplan Double-Barrel Alpha sa kapolisan daw wala man gihapon nimenus ang gidaghanon sa mga suplay karon sa ginadiling drugas.

Pila na man ka buok ang nangamatay niining kampanya batok sa ilegal drugas? Kapin na sa says mil ka tawo apil na kadtong mga gidudahang nalambigit sa ilegal nga drugas nga wala mapatay sa police operation kondili napatay sa mga wala pa gihapon mailhing mga kriminal.

Sa mga nanggawas nga mga balita, pirme na man minilyon ka pesos ang kantidad sa shabu nga nasakmit sa mga operasyon sa kapolisan batok sa ilegal nga drugas.

Busa, dili kalikayan nga nakapangutana ang publiko kun napuo ba gyud ang sindikato sa ilegal nga drugas niining gipangusgan nga kampanya o wala?

Asa man diay ning mga grupoha sa mga durugista dihang wala pa sugdi ang Oplan Tokhang. Mahimo hinuon isipon nga bunga kini sa mas subsob nga operasyon batok sa ilegal nga drugas karon kun itandi kaniadto.

Kanus-a pa kaha makabasa sa balita ang katawhan nga modeklarar ang gobiyerno nga drug-free na gyud ang nasud. Kanus-a pa kaha makalingkawas ang Pilipinas sa talikala sa maong dautan nga bisyo?

Dili kini imposible kun ang tanan, katilingban, gobiyerno, simbahan molusad gyud og lapad nga aksyon batok niini. Apan kinahanglan nga samtang kini gihimo wala untay shortcut sa balaod nga mahitabo.

Kini tungod kay mas maayo baya nga paminawon nga milampos ang mga Pilipino pagpuhag sa ilegal nga drugas sa tinarong ug subay sa balaod nga pamaagi kun itandi sa nagpasad nga mga pagpatay nga pulos shortcut.