Baron, giitsapwera sa PAMI

CEBU, Philippines - Dili na mutugot ang mga sakop sa Professional Artist Managers, Inc. (PAMI) nga makauban sa trabaho ang ilang mga talent ang kontrobersyal nga si Baron Geisler.

Lakip usab sa dili na nila tugutan mao ang paghatag og artista sa umaabot pa nga mga proyekto sa kanhi broadcast-journalist ug karon movie director na nga si Arlyn Dela Cruz. 

Matud pa presidente sa PAMI nga si June Torrejon-Rufino nga nakadawat ang iyang buhatan sa reklamo nga gipasang-at ni Ping Medina niadtong Miyerkules batok ni Baron. Gumikan sa reklamo ni Ping, nakab-ot sa mga sakop sa PAMI ang mao nilang hukom.

Ang manager ni Baron nga si Arnold Vegafria, kinsa sakop usab sa PAMI, nibasul kang Dela Cruz sa nahitabo gumikan kay palpak matud pa kini sa pagkontrol sa mga panghitabo sa iyang set. Kahinumduman nga nireklamo si Ping kay giihian matud pa siya ni Baron sa usa nila ka eksena sa  gigama karon nga pelikula nga nag-ulohan og “Bubog.” Matud ni Ping wala sa script ang gibuhat ni Baron.

Dream project

Nagmalaumon si Alden Richards nga unta hatagan og katumanan ang pangandoy nila ni Maine Mendoza nga mobida sa usa ka action movie puhon. “Action-comedy-romance movie. Hopefully, yung next concept of the movie will be like that. Fingers crossed”, tsika pa ni Alden.

Wala’y problema

Suportado ni Janno Gibbs ang pagbalhin ni Ogie Alcasid sa ABS-CBN. Matud pa niya nga malipayon siya sa nahimong hukom ni Ogie ug wala siya’y nakita nga problema bisan og dili na sila magkauban sa usa ka istasyon. Dugang pa ni Janno nga magpabilin gihapon ang ilang maayong pagtagad sa usa’g-usa.

Komportable ni  Jake

Mag-uban alang sa usa ka music video ang managhigala nga sila si Jake Cuenca ug Kiana Valenciano. Tsika pa ni Kiana nga personal choice niya si Jake tungod kay dugay na silang kaila niini. Dugang pa niya nga komportable siya sa mga pagahimoon nga init nga eksena tungod kay maayong actor si Jake.

Nagpahayay sa Sydney

Gi-post ni Heart Evangelista sa iyang Instagram account ang ilang pagpanglaag kauban ang iyang bana nga si Chiz Escudero sa Sydney, Australia. Malipayon ang magtiayon gumikan kay aduna sila’y higayon nga maka-date sa laing nasud. 

Nagkuyog sa pagsugat

Dili masukod ang kalipay nga nasinati sa Kapuso aktor nga si Ruru Madrid sa dihang gisugat niya ang adlaw’ng natawhan nga kauban ang iyang onscreen partner nga si Gabbi Garcia. Disinuwebe anyos na karon si Ruru ug bag-uhay lang pud nga nagsaulog si Gabbi sa iyang 18th birthday niadtong Biyernes. Personal nga gipaambit ni Gabbi ang iyang birthday greetings ngadto kang Ruru. Gani, wala usab siya magpaulahi nga mo-post og picture sa iyang Instragram account.

Magdrama na sab

Mosuway na pud og pahilak Sinon Loresca o mas nailhan isip usa sa mga Rogelia sa Kalyeserye sa Eat Bulaga. Kahinumduman nga hilig na siya nga mohatag og kalingawan ngadto sa mga viewers. Busa karon, gihagit niya ang iyang kaugalingon nga suwayan ang pagdrama.

Nag-viral  si Liza

Gisaw-an  sa mga netizen  ang hulagway ni Liza Soberano human kini nag-viral sa social media. Ang maong hulagway gikuha alang sa iyang pag-endorso sa usa ka branded nga relo. Human gi-post ang litrato niadtong bag-ohay pa lang, miabot sa kapin 200,000 likes ang nakuha niini.

Nag-una nga istasyon

Base sa Kantar Media, ang ABS-CBN maoy napiliang “Most Watched Television Network” sa buwan sa Nobiyembre. Nag-una ang tanang mga salida sa maong network kun diin miabot sa 44% ang audience share niini.

Grand finalist na

Gihinganlan na ang upat ka mga superstar finalist nga pasok na sa grand finals sa Pinoy Boyband Superstar niadtong Sabado sa gabii. Sila si Joao Constancia, Russel Reyes, Mark Oblea ug ang Sugbuanon nga Niel Murillo maoy sigurado nga mopadayon sa final round.

Wala nagplano

Giangkon ni Alice Dixson nga ang wala nila pagbaton og anak ang usa sa rasun kun ngano wala magdugay ang iyang relasyon ngadto sa iyang Fil-Canadian ex-husband. Matud pa niya nga wala gyud nila kini planuhi ug dili usab magtakdo ang ilang panan-aw sa kinabuhi. (BANAT NEWS)