Nagbaha ang followers
CEBU, Philippines - Miabot na og kapin sa duha ka milyon ang followers sa Pambansang Bae nga Alden Richards sa Instagram. Sa Twitter post ni Alden, gipadayag niya ang iyang pasalamat ngadto sa mga tawo nga walay puas sa pagsuporta kaniya ug sa iyang ka-loveteam nga si Maine.
Manghod ni Pauleen nag-artista
Natuman na gyud ang pangandoy sa manghod ni Pauleen Luna nga si Miguel nga makasulod sa showbiz. Mipirma kini og kontrata sa Viva Artist Agency dili pa lang dugay. Gibiyaan niya ang iyang trabaho isip real-time analyst sa usa ka kompanya aron lang gyud mag-artista. Matud pa niya nga gusto niya suwayan ang tanang mga role nga ipabuhat niya. Suportado sa iyang pamilya ang nakab-ot niya nga hukom.
Naghandom sa korte
Naghandom karon ang actor-athlete nga si Andre Paras sa mga panahon nga nagduwa siya og basketball. Kahinumduman nga varsity player si Andre niadtong nagtungha pa siya sa kolehiyo sa University of the Philippines partikular na sa grupong Fighting Maroons. Sa Instagram post ni Andre, gisaysay niya nga nagmasulob-on siya sa dihang kinahanglan niya biyaan ang korte alang sa karera niya sa showbiz. Wala usab siya magmahay gumikan kay nakahatag usab siya og kalingawan ngadto sa mga tawo pinaagi sa iyang pag-arte.
Tambag ni Pooh
Human nakumpirmar nga buwag na sila Angelica Panganiban ug John Lloyd Cruz, gitambagan ni Pooh ang aktres kabahin sa pagpangita og higugmaon sa kinabuhi. Gipaambit niya kini diin nahimo silang guest sa programang "Magandang Buhay. Nanghinaot si Pooh nga unta dili na taga showbiz ang sunod nga mataypan sa aktres. "Sana makakita na siya talaga ng para sa kanya. Dumating na sa kanya 'yung masasabi niyang magiging family niya. At masasabi niya na for life at magiging pamilya niya, 'yun na lang naman ang kulang sa iyo, at sana, sana hindi na showbiz. Try mo sa iba, try mo sa labas," matud pa ni Pooh.
Kontrabida na usab
Human sa teleserye nga Half Sisters nila ni Barbie Fortaleza, mahimo na usab nga kontrabida ang karakter ni Thea Tolentino sa bag-ong serye sa GMA-7 nga Once Again. Matud pa sa aktres nga dakong hagit kini alang kaniya gumikan kay mas agresibo ang iyang papel sa istorya. Dugang pa niya nga mas layo kini sa iyang batasan sa tinuod nga kinabuhi apan andam siya sa unsa ang ipabuhat sa direktor ngadto kaniya. “Kailangan maglevel-up na talaga, hindi naman forever pwedeng tweetums,” suma pa ni Thea.
Gididahan sa Cebuano actor “Ann Kenstein” ipasalida sa Singapore
Ipasalida karong adlawa sa Scape Gallery didto sa Singapore ang short film nga Ann Kenstein nga gibidahan sa Cebuano award-winning actor nga si Albert Chan Paran.
Tipik kini sa kalihokan nga gitawag og 48 Hour Film Project Singapore 2016 ug sa miaging semana pa lang niya nahibaw-an ang maong kalamboan pinaagi sa pagpahibalo sa Film and Media Arts International Academy.
“Actually, entry gyud ni sa FMA nga mo-compete with other Asian short films. The film challenge is to write, shoot and edit the film within two days and submit it to Singapore”, matud pa niya.
Gidala ni Albert ang karakter isip usa ka scientist nga si Anthony Walters nga naningkamot nga maluwas ang iyang anak gikan sa kamatayon.
Nagmalaumon si Albert nga unta makadaog sila sa maong kompetisyon gumikan kay talagsaon ra ang higayon nga adunay Sugbuanon nga musalmot sa maong prestihiyoso nga kalihukan.
Nasayran nga usa ka ekstra si Albert kaniadto sa mga pelikula sa mga banggiitang artista sa kauluhan.
Kahinumduman nga sa naangkon sa Sugbuanong aktor ang tropeyo nga Best Actor for Short Film sa 5th International Film Festival Manhattan New York City (IFFM NYC) .
Resulta kini sa maayo niya nga pagkadala sa indie film nga nag-ulohan og Julie nga ubos sa direksyon ni Clanch Dayve Belleza.
Gipasidunggan usab siya niadtong miaging tuig sa 3rd Nabunturan Independent Film Exhibition (NabiFILMex) 2015 isip Best Actor sa Nabunturan, Compostela Valley.
Nakadawat usab siya og award sa samang titulo sa 8th Ani Ng Dangal gikan sa National Commission for Culture and the Arts (NCCA) niadtong Pebrero.
“It’s my first national and international Best Actor awards and Presidential state honor which is given to me and only international award winning artists ang makadawat kada tuig. Dili ko makatoo kay na awardan pud og apil sila si Ms. Nora Aunor ug Governor Vilma Santos. Parang ka level mi sa awarding ceremony”, suma pa ni Albert.
Giangkon usab niya nga daghan siya og kakulian nga naagian sa wala pa niya makab-ot ang maong kalampusan. Usa na niini ang kakuwang sa budget sa pagama og proyekto apan dako ang iyang pagsalig sa kahitas-an nga makasugakod ra ang iyang grupo sa maong pagsulay.
Gibutyag usab niya nga dili siya mag-apas sa talent fee gumikan kay ang importante alang kaniya nga maangkon ang talagsaon nga opurtunidad nga maabot kaniya. (BANAT NEWS)
- Latest