Cebu City nanghawod na sa MEP!

CEBU, Philippines -  Niarangkada na ang mga pambato sa Sugbo alang sa Miss Earth Philippines 2014.

Si Jamie Herrell kinsa maoy pambato sa Cebu City, maoy napiling “Darling of the Press”  atol sa press presentation kagahapon. Nalakip usab siya sa top 10 sa Ms. Hana beauties (corporate award) kauban sila Miss Davao, Miss Melbourne, Miss Liloan,Cebu, Miss Dinalupihan, Bataan, Miss Sydney, Miss Sta. Rita, Pampanga,Miss Makati,Miss Gapan, ug Miss Tanuan.

Sa nilabay nga adlaw nalangkat usab niya ang silver prize alang sa Catwalk Challenge sa mao usab nga pageant ug naka bronze award siya sa Trash to Class Challenge. Sa nilabay nga semana, si Herell maoy napiling Best in Swimsuit sa Hamilo Coast Swimsuit Competition.

Labihan ang kalipay ni Jamie sa mao niyang mga kadaugan ilabi na nga sumad sa adlawng natawhan sa iyang amahan nga nipanaw na sa laing kalibutan kagahapon. Post niya sa Facebook: Today is my dad's birthday so I dedicate the gold medal to him. Happy Earth day everyone and Happy Birthday Daddy. I miss you and love you so much. Hope God is giving you a rocking birthday up at heaven.

Si Jamie maoy nakoronahan nga Aliwan Festival Queen 2013 busa mu-turnover siya karong Sabado sa iyang korona didto sa Aliwan Theater sa Pasay City. Sa nilabay nga tuig usab nakoronahan siya isip Mega Cebu Ambassadress ug Sinulog Festival Queen. Samtang si Miss Liloan, Cebu Crystal Star Aberasturi nakalangkat usab og bronze award para sa “Darling of the Press.”  Kanhi siya Miss Mandaue 2011 1st Runner-up ug Miss Cebu 2014 4th Runner-up.

Si Herrell sakop sa Wafer Models ni Marlon Wafer samtang si Aberasturi ubos sa Ozar Models ni Danny Booc. Silang duruha puros sakop sa Kagandahang Flores (KF) ni beauty queen maker Rodin Flores. Ang KF mao ang training camp nila ni Miss Universe Philippines MJ Lastimosa, Bb. Pilipinas Intercontinental Kris Janson, Bb. Pilipinas Tourism International Parul Shah ug Bb. Pilipinas 2nd Runner-up Hannah Ruth Sison. Gawas kang Herrell ug Aberasturi, laing duha pa ka mga Sugbuanon ang manimpad sa maong pageant. Sila mao ang pambato sa Mandaue City nga si Hannah Marie Caayon ug Dalaguete Cebu Piercelyn Pialago.

Singkwenta ka mga kandidata ang magtigi alang sa  Miss Earth Philippines 2014 Coronation Night ipahigayon karong  May 30, didto sa MOA Arena.