Raptors mipukan sa Spurs

CEBU, Philippines — Si Kyle Lowry mitali og nuybe sa iyang 24 puntos sa katapusang kuwarter, samtang si DeMar DeRozan midugang og 21 puntos sa dihang gipakgang sa Toronto Raptors ang San Antonio Spurs, 86-83  sa NBA kagahapon didto sa Air Canada Centre sa Toronto, Canada.

Miamot si Jonas Valanciunas og 15 puntos ug 11 ka rebounds alang sa Raptors nga miinat sa ilang home record ngadto sa 17-3 nga maoy ikaduhang labing nindot sa NBA karon nga season sunod sa Spurs nga kaduha pa lamang mapilde sa 21 ka duwa didto sa ilang balwarte.

Gawas niini, giputol sab sa Raptors ang upat ka sagunson nilang pilde sa mga kamot sa Spurs.

Si LaMarcus Aldridge mihipos og 17 puntos ug 14 ka rebounds, samtang sila si Pau Gasol ug Patty Mills nagkumboya’g 28 puntos sa Spurs nga naparot sa ikaupat nga higayon sa unom nila ka road games.

Ang Spurs alkansi lamang og usa ka palito, 70-69 human sa tres ni Bryn Forbes sa katapusang 6:52, apan sila si DeRozan ug Lowry mitusak sa ilang mga itsa aron paghatag og 74-69 nga labaw sa Raptors.

Human sa jump shot ni Mills, ang Toronto milusad og 6-0 run kortesiya nilang Lowry, Valanciunas ug DeRozan aron pag-inat sa ilang bentaha ngadto na sa nuybe puntos, 80-71 sa kapin dos minutos ang nahibiling oras sa duwa.

Human nakasikit sa iskor nga 86-83 sa nahibiling sayes segundos, ang Spurs duna pa unta’y tsansa nga makatabla, apan wala sila makatira hangtod nga napupos na lang ang oras.

Ang Raptors mipasud lamang og pito sa 23 nila ka itsa sa unang kuwarter, apan nagmangtas sila sa ikaduhang kuwarter diin milansang og 11 sa 20 nila ka tira aron pagposte og 44-37 nga labaw sa halftime. Bisan og kanunay nga moresbak ang Spurs, kontrolado na sa Raptors ang duwa sukad niadto.

Sa kinatibuk-an, ang Raptors nagbitbit na og 31-13 record, samtang ang Spurs nahagsa ngadto sa 30-17.

Sa uban pang mga resulta, ang Memphis Grizzlies mipaluhod sa Sacramento Kings, 106-88, ang Brooklyn Nets mipabugnaw sa Miami Heat, 101-95, samtang ang Washington Wizards mipilde sa Detroit Pistons, 122-112.