James, Curry mga team captain karon sa tinuig nga All-Star Game

CEBU, Philippines — Sila si LeBron James ug Stephen Curry maoy nanghawod sa botasyon alang sa NBA All-Star Game starters hinungdan nga sila maoy magsilbe nga team captains sa tinuig nga pasundayag sa liga diin magbangga ang mga bitoon niini karong Pebrero 18 didto sa Staples Center sa Los Angeles, California.

Si James, ang alas sa Cleveland Cavaliers nga upat ka higayon nahimong NBA Most Valuable Player, maoy nakahakot sa labing daghang  boto  sa  Eastern Conference nga miabot og 2,638,294 botos.

Samtang didto sa West, ang haring gangis sa Golden State Warriors nga si Curry maoy nangu sa nakuha niining 2,379,494 ka fan votes.

Gumikan niini, sila si James ug Curry mao ang dunay katungod nga mopili kun kinsa’y gusto nilang kuhaon nga teammates.

Subay sa bag-ong format sa All-Star Game, si Curry mahimong mokuha og player sa East bisan og sakop siya sa Western Conference. Kini gumikan kay dili na man gamiton sa NBA ang naandan nga East vs. West matag All-Star.

Kining bag-ong sistema nakadugang og pipila ka intriga sa liga kay sama pananglit ni James, puwede niyang kuhaon nga teammate si Kevin Durant sa Warriors o dili ba ang kanhi niya kauban ug higala nga si Kyrie Irving sa Boston Celtics.

Gawas ni James, naglakip sa gibotohan nga starters sa Eastern Conference mao sila si Irving, Giannis Antetokounmpo sa Milwaukee Bucks, DeMar DeRozan sa Toronto Raptors ug Joel Embiid sa Philadelphia 76ers.

Sa West, nakigduyog nilang Curry ug Durant mao sila si James Harden sa Houston Rockets ug Anthony Davis ug DeMarcus Cousins sa New Orleans Pelicans.

Ang final  line-up sa mga teams nga magbangga sa All-Star Game ipahibalo sunod Biyernes, Enero 26.