Thomas miluwas sa Cavs

CEBU, Philippines — Ang Cleveland mikolapso human nakalabaw og 23 puntos, apan salamat ni Isaiah Thomas nga milansang og duha ka free throws sa nahibiling 11 segundos sa duwa nga naghatag sa Cavaliers og munas ginhawa nga kadaogan batok sa Orlando Magic, 104-103  sa NBA kagahapon didto sa Quicken Loans Arena sa Cleveland, Ohio.

Human sa mga shots ni Thomas, ang Magic duna pa unta’y tsansa nga modaog, apan si Elfrid  Payton nasipyat sa krusyal niyang lay-up bisan og walay nagbantay sa nahibilin nga tres segundos.

Bisan pa man niini, wala pa makaginhawa og lawom ang Cavs gumikan kay human sa nahitabong  jump ball, ang forward sa Magic nga si Aaron Gordon maoy nakakuha sa rebounds ug mihapos dayon sa  bola nga may gilay-on nga 45 ka tiil.

Mao na lang ang kakugang ug kahingangha sa mga fans sa Cavs gumikan kay nasulod kini  dayong kapupos sa oras. Apan maayo na lang gani kay si Gordon nakahimo og jump-ball violation hinungdan nga gideklara nga ‘not counted’ ang milagroso unta niyang itsa.

Si Thomas mitapos uban ang 21 puntos, samtang si LeBron James mikadlit og 19 puntos alang sa  Cavs nga mipakgang sa upat ka sagunson niining pilde. Si James nanginahanglan na   lang   sab  karon og  25 puntos aron mamahimong ikapito nga player sa kasaysayan sa NBA nga nakatali og 30,000 puntos sa  ilang karera.

Didto sa Houston, si Eric Gordon mipabuto og 30 puntos aron pangulohan ang Rockets ngadto sa 116-98 nga demolisyon sa Minnesota Timberwolves.

Miabag ni Gordon si Chris Paul nga adunay 19 puntos, siyam ka assists ug unom ka rebounds ug si Clint Capela nga mipuntos og 20.  Si James Harden mihipos og 10 puntos sa iyang pagbalik sa Rockets human makapalta og pito ka duwa gumikan sa injury sa iyang paa.

Sa uban pang mga resulta, si Joel Embiid mitimbre og 26 puntos ug 16 ka rebounds sa dihang gibihag sa Philadelphia 76ers ang Boston Celtics, 89-80, samtang si Damian Lillard mitala og 26 puntos sa dihang gilubong sa Portland TrailBlazers ang Indiana Pacers sa iskor nga 100-86.