Suns mipahilom sa Thunder

CEBU, Philippines — Si Dragan Bender mitali og 17 sa iyang career-high 20 puntos sa second half, samtang si rookie Josh Jackson mikulit og 17 puntos ug 10 ka rebounds sa labing unang ‘double-double’ sa iyang karera sa dihang ang Phoenix Suns misidlak ngadto sa 114-100 nga kadaogan batok sa  Oklahoma City Thunder sa NBA kagahapon didto sa Talking Stick Resort Arena sa Phoenix, Arizona.

Nagkayo ang opensa, si  Bender miposa og unom ka tres, lima niini iyang gitagak sa second half alang sa Suns nga miparot sa Thunder sa ikatulong sunod-sunod nga higayon sukad pa sa miaging season.

Sila si Devin Booker ug T.J. Warren nagkumboya’g 49 puntos alang sa Suns nga mirehistro sa ika-16 pa lamang nilang daog sulod sa 42 ka duwa.

Ang reigning MVP nga si Russell Westbrook mitala sa ika-14 niyang ‘triple-double’ karon  nga season uban ang 26 puntos, 11 ka assists ug 10 ka rebounds, apan nahuyhoy ang abaga niini human sa duwa ilabi na kay ang Thunder wala makatilaw og labaw sukad pagsugod sa duwa.

Si Paul George miiskor og 19 ug si Steven Adams dunay 18 puntos sa Thunder nga nadakin-as ngadto sa 22-18.

Didto sa Portland, si CJ McCollum mipasud sa iyang floater sa nahibilin nga 5.9 segundos sa duwa aron aswaton ang TrailBlazers ngadto sa kulbahinam nga daog batok sa San Antonio Spurs, 111-110.

Si McCollum mitapos uban ang 25 puntos ug si Maurice Harkless mikadlit og 19 puntos alang sa TrailBlazers nga midaog  na kalima sa katapusan nilang pito ka duwa. Ila kining nakab-ot bisan og wala ang starter nilang si Damian Lillard nga nayayay.

Nangulo sa Spurs mao si LaMarcus Aldridge nga adunay 30 puntos ug 14 ka rebounds, samtang si Manu Ginobili mipabuhagay og 26 puntos, apan   nakawang  lang kini gumikan kay mikunhod ang ilang rekord ngadto sa 27-14.

Sa laing aksiyon, si Brandon Ingram mibahog og 20 puntos ug pito ka assists sa dihang gibalian og pako sa Los Angeles Lakers ang Atlanta Hawks, 132-113  aron putlon ang siyam ka sunod-sunod nilang pilde.

Sa uban pang mga resulta, si Josh Richardson mipasulod sa iyang lay-up sa katapusang 5.1 segundos sa duwa aron agakon ang Miami Heat ngadto sa  kutas nga  kadaogan batok sa Utah Jazz, 103-102 ,  samtang si Kristaps Porzingis mipabuto og 29 puntos aron pangulohan ang New York Knicks batok sa Dallas Mavericks, 100-96.  (BANAT NEWS)