Ramirez naghari sa FDR GP Series
CEBU, Philippines — Ang Sugboanong rider nga si Sylvester Ramirez mitak-op sa iyang 2017 race season pinaagi sa usa ka masipang buto human midaog og tulo ka titulo ug duha ka first runner-up nga tropeyo sa katapusang leg sa Yamaha Philippines-sponsored FDR Grand Prix Series diha sa Kartzone sa Barangay Kasambagan, dakbayan sa Sugbo.
Si Ramirez sa FDR-Mallari Racing Team mipilde sa iyang teammate nga si RJ Commendador aron pagbira sa Unioil expert underbone title.
Gidominar sab niya ang novice underbone batok nila Jaycob Cabahug ug Rommel Paz. Wala pa matagbaw gilangkat niya ang korona sa novice automatic human gipilde ang mga kauban niyang sila si John Paul Manatad ug Van Ricablanca.
Hinuon, sila si Cabahug ug Solon mipugong ni Ramirez pag-iskor og sweep.
Si Cabahug maoy nanghawod sa expert automatic, samtang si Solon misakmit og duha ka kampiyonato sa intermediate automatic ug underbone pulos batok ni Ramirez.
Si Gian Commendador, igsuon ni RJ, nagparamdam sab sa iyang presensiya pinaagi sa pagdaog sa kids race.
Lain pang duha ka batos sa FDR-Mallari Racing ang nanghawod. Sila si Janesse Lucero sa ladies division ug Francis Castaneda sa Mio MXi One-make club race. (BANAT NEWS)
- Latest
