Amahan ni Lonzo Ball may awhag sa Lakers
CEBU, Philippines — Mipakita gilayon og kahanas si Lonzo Ball sa linghod pa niyang karera uban sa Los Angeles Lakers.
Ang gikaintapang rookie mikadlit og 29 puntos sa ikaduha niyang duwa sa NBA nga nagtuboy sa Lakers ngadto sa 132-130 nga kadaogan batok sa Phoenix Suns.
Apan ning puntoha, duna sa’y nasigpatan nga dili maayong aspeto sa iyang dinuwaan ug kini mao ang dili ‘consistent’ niyang shooting.
Gitumbok sa iyang amahan nga si LaVar Ball nga ang kakulang og playing time sa iyang anak maoy hinungdan niini.
Matud pa sa maguwang nga Ball nga kun ugaling si Lonzo hatagan lamang og ensaktong oras, hayan nga dako og kahigayonan nga modaog ang Lakers labi na kun ila kining ibabad sa katapusang kuwarter.
“Let him play the whole fourth quarter and bet you’ll always win. He'll get into a better flow,” matud pa ni LaVar Ball. “The in and out, sitting out six to 10 minutes? He’s not going to take no shots because he’s not in the flow."
Wala hinuon mabalaka niini ang Lakers gumikan kay wala maibani ang taas nilang pagsalig ni Lonzo nga giisip nilang lider nga maoy mogiya sa ilang kampanya ug modan-ag sa ilang dalan karon nga season.
Sa kasamtangan, ang Lakers nagbitbit og 5-5 nga baraha. (BANAT NEWS)
- Latest