Portis gisuspenso walo ka duwa sa Bulls

CEBU, Philippines — Ang Chicago Bulls misuspenso og walo ka duwa sa forward nilang si Bobby Portis, usa ka adlaw human gisukmag niini si Nikola Mirotic atol sa ilang praktis nga miresulta ngadto sa pagkabuak sa apapangig sa iyang teammate.

Si Bulls executive vice president John Paxson  nga maoy mipahibalo sa maong silot, mipahibalo sab nga si Mirotic dili makaduwa sulod sa upat hangtod sa unom ka semana gumikan sa bali ug bun-og nga  nahiaguman nunot sa maong panagbangi.

Bisan pa og giangkon sa duha ka hintungdan ang responsibilidad sa ilang binuhatan, si Paxson nagkanayon nga dili makiangayon ang gihimo ni Portis nga nakapadismaya og maayo kanila.

Gipasabot ni Paxson nga si Portis dili usa ka dautan nga tawo, apan kinahanglan kini nilang silotan bugti sa iyang gibuhat.

Si Portis magsugod sa iyang suspensiyon karong adlawa sa dihang ang Bulls mo-host sa Toronto Raptors.

Ang 26-anyos nga si Mirotic mi-average og 10.6 points ug 5.5 rebounds sulod sa 70 ka duwa sa miaging season ug gipaabot nga ipaslak siya sa starting five karon nga season human mipirma og duha ka tuig nga kontrata nga mibalor og $12.5 million uban sa Chicago. Samtang si Portis, 22 anyos, mipatik og 6.8 points ug 4.6 rebounds sa 64 ka duwa sa miaging season. (BANAT NEWS)