Wade, Bulls mag-iyahay og dalan

CEBU, Philippines — Nagkasinabot na si Dwyane Wade ug ang Chicago Bulls nga mag-iyahay og dalan human sa unang season sa beteranong point guard uban sa iyang hometown team.

Segun sa taho sa ESPN, ang 35-anyos nga si Wade ug ang Bulls management nagkauyon nga paliton ang iyang kontrata. Si Wade gitakda nga mokita og $23.8 million uban sa Bulls sa sunod nga NBA season. Kun mahan-ay na tanan ang ilang kasabotan, mahimo na siyang modawat og tanyag gikan sa ubang teams. Lakip sa mga koponan nga interesadong mokuha ni Wade mao ang Cleveland Cavaliers, Oklahoma City Thunder, San Antonio Spurs ug ang kanhi niya Miami Heat team.

Si Wade mi-average og 18.3 puntos ug 3.8 assists sulod sa 60 ka duwa uban sa Bulls sa miaging season nga maoy labing mubo niyang mga numero sukad sa iyang pagka-rookie niadtong 2003. (BANAT NEWS)