Garing sud sa finals, Nangka teams buhi pa
CEBU, Philippines — Ang Garing mipanso og championship ticket, samtang ang mga koponan sa Nangka mipuwersa og knockout match sa twice-to-beat foes nilang mga kaatbang sa 7th Mayor Teresa 'Nene' P. Alegado Fiesta Basketball Cup didto sa Consolacion.
Si Bernabe Tubin mitikdol og 18 puntos ug si John Rolito Arela miiskor og 11 sa dihang gipalayas sa Garing ang Polog, 74-34 aron pag-abante sa finals sa Midgets Category B.
Bisan og segurado na ang ilang kadaogan, wala gyud mikompiyansa ang Garing ug gani misamot pa kini og kabangis sa nanghinapos nga bahin sa duwa aron paglubong sa Polog og 40 puntos.
Sa Midgets Category A, padayong nanikaysikay ang Pulpogan nga makasud sa kampiyonato human gipakuratan ang inilog nga Casili, 77-70.
Si Rovello Robles mipatuasik og 25 puntos ug si Prince Soquiño mikadlit og 21 puntos alang sa Pulpogan nga milusad og 28-12 run sa katapusan hunat sa duwa aron pagpatiurok sa Casili.
Sa Inter-Barangay Seniors Category A, ang Nangka nakaangkon pa og laing kinabuhi human gipakgang ang twice-to-beat Poblacion Oriental sa kulbahinam kaayo nilang duwa, 79-78.
Si Paul Iverson Collango mipabuhagay og 30 puntos, apil na niini ang iyang follow-up shot sa himalatyong segundos nga maoy nagbayaw sa Nangka ngadto sa himaya.
Buhi pa sab ang mga batos sa Nangka sa SK Juniors Category A human gipilde ang Pitogo, 81-71 ubos sa pagpangulo ni Fritz Ropal nga mibahog og 21 puntos. (BANAT NEWS)
- Latest
