Tepora mi-K.O. ni komanisi sa round 2

CEBU, Philippines — Ang bitoon sa Omega Boxing Gym nga si Jhack ‘El Capitan’ Tepora milampos sa labing una niyang away gawas sa nasud dihang miiskor siya og makalilisang nga second round knockout batok ni South African  Lusanda Komanisi aron pagsakmit sa WBO Intercontinental featherweight title kagahapon didto sa East London, South Africa.

Ang maong  daog  mibutang ni Tepora  isip usa sa mga masidlakong   world title hopefuls sa nasud.

Ang 24-anyos nga si Tepora mipatugpa og  makabungog nga right hook sa apapangig ni Komanisi nga nahagsa og kadiyot nga nawad-an sa iyang panimuot.

Misuway pa og bangon si Komanisi, apan naabtan na siya sa ihap sa referee.

Si Tepora,  ang kanhi WBO Asia Pacific Youth ug WBO Oriental super bantamweight champion, mipalambo sa iyang rekord ngadto sa 21-0, 16KOs, samtang si Komanisi nakatilaw sa ikaupat niyang pilde sa 25 ka away.

Giputol ni Tepora ang nine-fight winning streak ni Komanisi lakip na niini iyang knockout nga kadaogan batok sa Sugboanong si Roli Gasca atol sa ilang IBO featherweight fight sa miaging tuig. (BANAT NEWS)