Jaguars mobawos sa Webmasters

CEBU, Philippines — Magtigi pag-usab ang  University of San Jose-Recoletos (USJ-R) Jaguars ug University of Cebu (UC) Webmasters, ning higayona bitbit ang managlahing tumong sa  17th Cebu Schools Athletic Foundation, Inc.(CESAFI) men’s basketball tournament karong adlawa diha sa Cebu Coliseum.

Ang duwa sugdan sa alas-5:30 sa hapon.

Lab-as pang mihaw-as gikan sa 73-67 nga daog batok sa Southwestern University-Phinma (SWU) Cobras, tinguha   sa    Jaguars dili lamang ang pagpanimawos sa 77-83 nilang kaparotan sa UC niadtong Septiyembre 2, apan hasta sab pagpadayon sa ilang panikaysikay nga mabira ang No. 2 spot, samtang ang Webmasters naglaraw og krusyal nga daog     aron   pagseguro sa ilang luna sa semifinals.

Tangag ang 7-2 win-loss record, ang Jaguars nanginahanglan na lang nga modaog ka usa sa nahibilin nilang tulo ka duwa aron pag-angkon og twice-to-beat incentive sa 'round of four' lagmit batok sa University of San Carlos (USC) Warriors nga natagak ngadto sa 6-4 human mapilde og tulo sa upat ka duwa sa ikaduhang hugna sa eliminasyon.

Samtang ang Webmasters anaa karon sa ikaupat nga puwesto bitbit ang 5-4 nga baraha, apan kinahanglan pa sila og usa ka daog aron hamugaway ang ilang pag-abante sa sunod nga hugna.

Kun ugaling mahitabo kana, nag-atang kanila ang twice-to-beat defending champion University of the Visayas (UV) Green Lancers.

Sa dili pa magtakus ang Jaguars ug Webmasters, ang SWU Cobras mangindahay nga buhion ang himalatyon nilang tsansa nga makasulod sa semis sa ilang pakigsangka batok sa University of Southern Philippines Foundation (USPF) Panthers sa alas-4 sa hapon.

Sa pasiunang duwa karong adlawa, ang Cebu Institute of Technology-University (CIT-U) Wildcats makiglayog sa USJ-R Baby Jaguars sa ala-1 sa hapon ug sundan dayon  duwa tali sa University of San Carlos (USC) Baby Warriors ug Cebu Eastern College (CEC) Dragons sa alas-2:30 sa hapon. (BANAT NEWS)