Donaire nagpanikad na

CEBU, Philippines — Nagpanikad na si kanhi four-division world champion Nonito Donaire Jr.  nga mopamatuod nga duna pa siya’y igong katakus sa iyang pag-away og balik diin iyang makasangka ang Mehikanong si Ruben Hernandez didto sa Alamodome sa San Antonio, Texas ugmang adlawa.

Ang 34-anyos nga si Donaire (37-4, 24KOs) makigtige ni Hernandez sulod sa 12 ka hugna nga maoy momarka sa pagbalik niya sa featherweight division.

Bisan tuod og wala na makaaway pa sulod sa 10 ka bulan, si Donaire  masaligon sa iyang tsansa nga modaog batok ni Hernandez ug gani naglantaw na siya sa mas dagkong away sa maong weight class

“After this fight, I’m coming for all of the featherweight champions and to prove I’m the best in the division,” matud pa ni Donaire nga gihuboan sa iyang bakus isip WBO super bantamweight champion ni Jessie Magdaleno niadtong Nobiyembre 2016 didto sa Las Vegas.

Sa iyang bahin, si Hernandez (22-2, 9KOs) sayod nga malisud nga hagit ang iyang sagubangon, apan nanganti kini nga iyang idiskaril ang pagbalik ni Donaire ug kun unsa pa man gani ang mga plano niini.

“I know that I am facing a great fighter and that has motivated me to train harder than ever before for this match up,” sumala pa ni Hernandez  nga miharos og daog sa katapusan niyang pito ka away. (BANAT NEWS)