E&F surplus nagpabiling wa’y pilde sa J&J Surplus Caging
CEBU, Philippines — Nagpabilin nga walay pilde ang E&F Surplus human midaog batok sa GT Cosmetics Warriors, 72-66 sa 9th J&J Surplus Ballclub basketball tournament niadtong Huwebes sa gabii didto sa GT Academy gym sa Tayud, Lilo-an.
Ang E&F Surplus nagbitbit na karon og 5-0 nga baraha aron magsolo sa liderato ubos sa bracket A.
Si team owner Fury ‘Triggerman’ Trazona mao na sab ang nagmangtas sa E&F Surplus nga mitusak og 16 puntos, apan si Anton Trangia maoy topscorer sa kadaogan mipatuasik og 22 puntos.
Nitampo sab 10 puntos si Tata Betinol alang sa E&F Surplus nga milabaw og 14 puntos paghuman sa tulo ka kuwarter, 54-40.
Miaksiyon og gukod ang GT Cosmetics ug napahakan ang labaw sa E&F Surplus ngadto sa single digit sa fourth quarter apan napawong ang paglaum nga mailog ang labaw dihang mibalik ang kabangis ni Trazona.
Bugtong si William Alegado lang ang miiskor og double figures sa GT Cosmetics pinaagi sa iyang 39 puntos.
Sa laing duwa sa bracket A, nakatilaw na gyud og daog ang Purok Dabong sulod sa upat ka duwa human nila pildiha ang Villareyna Subdivision, 59-50.
Sila si Ron Pascua sa Purok Dabong ug Helberto Radoc sa Villareyna parehong mikadlit og 17 puntos aron pangulohan ang tagsa-tagsa nilang koponan. Ang Villareyna ni Joel Camillo nagbitbit og 1-4 nga baraha.
Sa bracket B, ang J&J Surplus ni Henry Agbon mipapas sa sunod-sunod nilang demalas human midaog batok sa Domz Auto Supply, 85-80.
Ang Domz Auto Supply naghangad sa abilidad ni Larry Oroyan nga mipabuhagay og 25 aron pangulohan ang kadaogan. Sila si Jomar Tiwan ug Yars Yuson mitimang og 14 puntos matag usa sa J&J Surplus nga naglukdo na og 3-2 nga baraha.
Biya sa first period, 17-24, apan ang J&J Surplus miarangkada sa mosunod nga mga kuwarter aron makaipsot sa sikit nga duwa.
Ang Domz Auto Supply gipangulohan ni Michael Baring nga mikadlit og 40 puntos.
Ang team ni Domz Mercader wala pa makatilaw og daog sa upat ka duwa niining maong torneyo nga ubos sa pagtugot sa presidente nilang si Henry Agbon.
Ang mga duwa gipadagan ni league commissioner Fury Trazona ug technical committee Chang Tejero sa abag nilang Jeper Inahid, Noel Calo ug Choy Pilapil.
Puntos matag usa
Unang duwa:
J&J Surplus (85) – Oroyan 25, Tiwan 14, Yuson 14, Adolfo 9, Cabahug 7, Astillero 6, Genterolizo 6, Hayahay 4, J. Agbon 2.
DOMZ (80) – Baring 40, Icot 15, J. Ortiz 8, Jugalbot 8, C. Ortiz 6, Doming 3.
Ikaduhang duwa:
E&F Surplus (72) – Trangia 22, Trazona 16, Betinol 10, A. Sabang 5, Igoy 5, K. Sabang 4, Caballes 4, Pepito 2, Palo 2, Ponce 2.
GT Cosmetics (66) – Alegado 39, Cañete 9, Bernadal 5, R. Ponce 3, W. Ponce 3, Ybañez 3, Pepito 2, Estelloso 2.
Ikatulong duwa:
PUROK Dabong (59) – Pascua 17, K. Caparroso 9, Eyac 9, Mangubat 7, Herbieto 5, J. Caparroso 5, Halod 2, Normandia 2, Jugalbot 2, Estole 1.
VILLAREYNA (50) – Radoc 17, J. Yurag 9, Rendon 7, J. Arnado 6, M. Yurag 4, Camillo 3, Bitco 2, Tradio 2. (BANAT NEWS)
- Latest
