Bogut L.A. Lakers na

CEBU, Philippines — Mipasilong ubos sa landong sa Los Angeles Lakers ang Australian center nga si Andrew Bogut human siya mipirma og usa ka tuig nga kontrata uban sa maong koponan.

Nahimong free agent ang 32-anyos  nga  si Bogut sukad siya mibiya sa  Cleveland  niadtong Marso sa dihang nakahiagom siya og angol sa iyang tiil sa labing una niyang duwa sa Cavaliers. Matud pa sa ahente niyang si David Bauman, nga si Bogut modawat og $2.3 million segun sa nakab-ot niining kasabotan sa Lakers

Nagsugod ang pagbalhin-balhin og team ni Bogut niadtong 2016-2017 season sa dihang ubos pa siya sa poder sa Dallas Mavericks diin siya mi-average og tres puntos ug 8.4 rebounds sulod sa 26 ka duwa. 

Gi-trade dayon siya sa Philadelphia 76ers, apan ang iyang kontrata gipalit hinungdan nga napunta siya sa Cavaliers. Ang iyang karera sa Cavs milanat lamang og 58 segundos kay nabali ang iyang tiil gumikan sa panagbangga nilang Okaro White sa Miami Heat. Si Bogut, ang No.1 pick sa 2005 draft, sakop sa Golden State Warriors nga nakampiyon sa NBA Finals niadtong 2015 ug runner-up sa sunod nga season. Ang labing nindot nga salida ni Bogut sa 13 ka tuig niyang karera sa NBA nahitabo niadtong 2009-2010 diin siya mi-average og 15.2 puntos ug 10.2 rebounds sa Milwaukee Bucks. (BANAT NEWS)