Macrohon Open Invitational mosikad ugma
CEBU, Philippines — Eksplosibo ug kulbahinam nga aksiyon sulod sa korte ang mobalik sa lungsod sa Macrohon didto sa Southern Leyte nunot sa pagpahigayon sa usa ka open invitational basketball tournament karong Septiyembre 21-24.
Dul-an sa P300,000 nga ganting salapi ang gitagana alang sa mga mananaog sa maong kalihukan nga gituyo aron pagdugang og lamas sa tinuig nga kapistahan sa ilang mahal nga patron Saint Michael Archangel.
“In keeping with our tradition of commemorating this annual event with so much aplomb and fanfare, we have lined up various activities, foremost of which is the holding of this open tournament,” matud pa ni Macrohon Mayor Alan Jose Kuizon Aroy.
Lima ka teams nga adunay representasyon sa tulo ka dagkong isla sa nasud ang mopakita’g aksiyon sa upat ka adlaw nga torneyo nga mosikad na ugmang adlawa.
Kini mao ang University of the Visayas (UV) Green Lancers/Team Samsam Gullas, Fighter Wine Fighter 50 ug Dondel Basketball sa Cebu, Aksyon-Agad Team ComVal ni Compostela Valley Governor Jayvee Tyron L. Uy ug Cocolife Hobe-Macway Hobe sa Manila.
Sa lima, ang Hobe-Macway maoy labing inilog nga molangkat sa titulo gumikan sa presensiya sa upat ka kanhi PBA players nga sila si Bonbon Custodio, Jerwin Gaco, Roger Yap ug Sunday Salvacion.
Moduwa sila ubos sa single round robin format, diin ang top 2 human sa eliminasyon maoy mag-abot sa kampiyonato.
Ang mokampiyon mobulsa og P100,000, samtang ang mopahiluna sa ikaduha ug ikatulong dapit modawat og P75,000 ug P50,000. Ang motapos sa ikaupat ug ikalima makadawat og P30,000 ug P20,000.
Gawas sa dagkong mga premyo, ang Macrohon LGU motanyag sab og libreng transportasyon, akomodasyon ug pagkaon sa tanang mga partisipante sa tibuok nga bahin sa torneyo nga ubos sa superbisyon sa league organizer ug talent scout nga si coach Van Halen Parmis. (BANAT NEWS)
- Latest
