Team 2 kampiyon sa CSNBC Friendship Cup 2017
CEBU, Philippines — Nakasungasong sa lawod sa kalisdanan ang Team 2 ug ilang gipilde ang Team 1 sa iskor, 61-56 aron pagsakmit sa Consolacion San Narcico Basketball Club (CSNBC) Friendship Cup 2017 title niadtong Sabado sa gabii didto sa Cansaga gym sa Consolacion.
Gikan sa pagsugod, ang Team 2 ni Ryan Ricafort maoy pirmeng naggukod, apan wala kini makapaluya kanila ug ang 3-point shot ni Chito Lleve maoy nakapalabaw sa koponan sa unang higayon, 40-39 sa nahibiling 3:05 sa third period. Sukad niadto, salida na tanan sa Team 2 hangtod sa katapusang hagtik sa orasan.
Si Lleve maoy labing kuyaw nga nakaduwa ilabi na sa fourth period ug gipangulohan ang Team 2 pinaagi sa iyang 19 puntos. Natakdan sab sa kamangtas ni Lleve silang Philip Tuburan ug JP Lumpas nga pulos sab miiskor og double digits.
Posible untang mahatod sa Team 1 ang duwa ngadto sa overtime dihang labaw lang og tres puntos ang Team 2 sa nahabiling 10 segundos sa fourth quarter, apan mikagar ang 3-pointer ni Niño Flores.
Ang duha ka free throws ni Tuburan maoy miselyo sa kadaogan sa Team 2 nga naglumpayat sa kalipay.
Ang Team 1 ni Marvin Boyles gipangulohan ni Niño Flores nga mikamada og 15 puntos. Misalida sab si Jey Mondarte aron moambit og 14 puntos, samtang sila si Roldan Saldo ug Michael Avila mitampo’g 12 puntos matag usa.
Sa gubat alang sa ikatulong puwesto ang Team 4 mipilde sa Team 3 sa iskor nga 46-40.
Si Orlando ‘Lando’ Mondarte mipakitang gilas aron mokadlit og 16 puntos, ingon man pangulohan ang scoring sa Team 4 ni James Zapanta nga nakalingkawas sa bangis nga duwa sa Team 3 ni Jairus Gabutan.
Si Ismael Jabonero mitimang og 11 puntos alang sa Team 4 nga diha na nakaginhawa og lawom dihang sila na nikontrolar sa nahibiling dos minutos sa duwa.
Ang napildeng Team 3 gipangulohan ni Turkz Broa nga mipatuasik og 15 puntos, samtang sila si Julius Rebuyas ug Homer Lacio nagtampohay og 10 puntos.
Ang CSNBC nga anaa sa ikalima ka tuig, namugna pinaagi sa paningkamot sa Core Group Committee nga naglangkob nilang Sturdi Majarocon, Jeb Tibon, Turkz Broa, Kier Nathaniel Quitay ug Marvin Boyles uban nilang Atty. Mandi Majarocon ug Orlando Mondarte isip advisers.
Ang liga gipaluyohan sa Orlmon Video, LCB Majarocon Forwarder, Boyles Tinsmith ug Paul Jude Mondarte. Ang mga duwa gipadagan ni league commissioner Lando Mondarte sa abag nilang Tata Genterone, Boboy Zanoria, Ronron Ycon ug Kenneth Tagalog sa CEBRA.
Puntos matag usa
Unang duwa:
TEAM 4 (46) – O. Mondarte 16, Jabonero 11, Ruben 7, Majarocon 6, Revales 6.
TEAM 3 (40) – T. Broa 15, Rebuyas 10, Lacio 10, Rosas 6, Payla 1.
Ikaduhang duwa:
TEAM 2 (61) – Lleve 19, Tuburan 12, Lumpas 11, Vale 7, Felix 6, Zoi 3, Quimod 2.
TEAM 1 (56) – Flores 15, Jey Mondarte 14, Saldo 12, Avila 12, Mondarte 2, Boyles 1. (BANAT NEWS)
- Latest