UV 3-0 na, abante sa Bayugan Mayor’s Cup Final
BAYUGAN CITY, Agusan del Sur, Philippines – Human gilat-an ang Emilio Aguinaldo College (EAC) Generals, ang University of the Visayas (UV) Green Lancers mikulit og dugang duha pa ka daog aron pag-angkon og luna sa final bitbit ang 3-0 record sa 2nd Mayor Kim Lope A. Asis Collegiate Basketball Invitational Tournament dinhi sa Lope Asis Memorial Gymnasium kagahapon.
Ang Lancers milubong sa Xavier University-Ateneo de Cagayan Crusaders, 110-70, ug gilubong sab nila ang University of Southern Philippines Foundation Panthers, 110-89.
Gumikan niini, ang Cebu Schools Athletic Foundation, Inc (CESAFI) champion nangandam sa ilang kaugalingon alang sa usa ka dakong gubat batok sa University of Sto. Tomas Growling Tigers nga miharos og daog batok sa Generals, 88-77 ug Crusaders.
Ang UV daw sa wala kaayo maninuod sa sinugdanan batok sa Crusaders gumikan usa lamang sa ilang starting five ang miduwa sa unang kuwarter ug ingon man sa second period. Bisan pa man niini, naglabaw gihapon sila sa halftime, 46-39.
Nagsugod na ang masaker sa dihang gipasulod ni coach Gary Cortes ang tanan niyang mga sinaligan sa second half. Unang misalida si Josue Segumpan nga miiskor sa tanan niyang 13 puntos sa ikatulong kuwarter sa dihang ang Lancers miinat sa ilang labaw ngadto sa 76-54 nga ila pang gipaburot ngadto sa 41 puntos, 101-60 sa nahibilin nga 2:52 sa duwa.
Batok sa Panthers, ang Lancers yano sab nga mipapas sa sayo nilang 13 puntos nga alkansi ug dayon mi-rally sa ikaduhang kuwarter aron pag-usab sa dagan sa duwa pabor kanila.
Biya sa iskor nga 19-32, sila si Sheldon Gahi, Rey Suerte ug Tristan Albina milansang og tulo ka sagunson nga tres aron pagduslit sa init nga 42-11 rally nga nakahatag kanila og 61-43 nga bentaha sa first half.
Giinat pa sa Lancers ang ilang labaw ngadto sa 30 puntos, 96-69 nga nakapasamot og kayagaw sa duwa sa Panthers sa nahibiling siyete minutos sa duwa. (BANAT NEWS)
- Latest
