Mandaue, Consolacion magtiwas

CEBU, Philippines - Laraw sa Mandaue City ug Consolacion nga tuldokan na ang wala pa maresolbar nilang isyu sa ilang panag-abot sa deciding game sa “best-of-three” finals series alang sa North Division title sa 2017 Cebu Governor’s Cup Under-21 Inter-Cities and Municipalities Basketball Tournament karong gabii diha sa Mandaue City Cultural and Sports Complex.

Ang ‘do-or-die’ match gikatakda sa alas-7 sa gabii diin ang modaog maoy moharong sa South Division champion Minglanilla alang sa  Governor’s Cup finals nga nagtangag og P500,000 nga ganti.

Ang Consolacion maoy nakauna sa serye, 84-78, apan ang Mandaue nakaangkon og laing kinabuhi human sa kulbahinam nilang kadaogan, 85-81  sa Game 2 niadtong Lunes sa gabii didto sa Consolacion Sports Complex.

Si Christopher Isabelo nga sakop sa USPF Baby Panthers, miiskor sa tanan niyang 11 puntos sa katapusang kuwarter, apil na ang duha niya ka free throws nga maoy nagseguro sa ilang daog sa himalatyong segundos sa duwa.

Sa wala pa ang pagkamabayanihon ni Isabelo, nakaangkon og dugang kahayag ang Mandaue gumikan sa pagbalik og duwa sa ilang All-Star center nga si Jancork Cabahug.

Misalida dayon si Cabahug aron pangulohan ang Mandaue uban sa iyang 22 puntos, 13 niini sa unang kuwarter nga nakahatag kanila og  25-23 nga labaw.

Sikit kaayo ang kumbati sa duha ka koponan sa katapusang kuwarter. Human naka-tres si Cyril Sabellana aron pagpasikit sa Consolacion ngadto na lang sa dos puntos, 81-83, duna unta sila’y tsansa nga makatabla, apan pakyas human si  Froiland Maglasang nasipyat sa  duha niya ka free throws sa nahibiling otso segundos sa duwa.

Ang alas sa Consolacion nga si JC Escalona wa’y laing nahimo kun dili ang pag-foul ni Isabelo sa tinguha nga mapugngan ang pagpitik sa nagkahilis nga oras.

Apan si Isabelo wa’y  kurat taliwala sa naglagiting nga presyur aron  pagpasud sa duha niya ka krusyal nga free throws sa nahibiling singko segundos aron pagselyado sa kadaogan sa Mandaue.

Gawas nilang Cabahug ug Isabelo, mibida sab sa Mandaue si Froilan Mangubat nga dunay 18 puntos ug si Ken Gato nga mihipos og 11 puntos.

Si Emmanuel Villamor miratsada og 25 puntos, samtang si Sabellana mipupo og 16 puntos sa pilderong Consolacion. (BANAT NEWS)