Mayweather mudaog vs McGregor – Pacquiao
CEBU, Philippines – Daling gipili ni Pinoy boxing icon Manny Pacquiao ang iyang kanhi karibal nga si Floyd Mayweather Jr. nga mudaog batok sa UFC star nga si Conor McGregor sa sangka sa duha sa Agosto 26 didto sa Las Vegas.
Sama sa kadaghanan sa mga boxing analysts, si Pacquiao miingon nga walay dag-anan si McGregor batok sa undefeated boxer tungod usab kay sa boxing ring magsangka ang duha ug walay kasinatian sa sport ang Irish fighter.
“I can say Floyd Mayweather will win because the fight is in boxing, not MMA. So the advantage is with Floyd,” matud pa ni Pacquiao sa The Philippine STAR.
Nakita ni Pacquiao nga dili komportable si McGregor nga bugtong kumo ra ang gamiton sa pakigsangka di sama sa mixed martial arts diin mamahimo nga mamatid o mudumog batok sa imong kontra.
“I don’t think McGregor is comfortable in pure boxing,” dugang pa ni Pacquiao.
Hinuon, bisan pa og kapila na sila nagbikil ni Mayweather, ang eight-division world champion nanghinaot gihapon nga mahimong lingaw ang sangka ni Mayweather ug McGregor di sama sa gilauman sa kadaghanan nga mamahimo kining laay tungod usab sa istilo ni Mayweather. (LPM) (BANAT NEWS)
- Latest
