E-League Season 13 mosikad na karong adlawa

CEBU, Philippines - Mohimo og kasaysayan.

Mao kini ang misyon sa two-time defending champion Convergys Converters sa dihang sugdan na nila ang ilang kampanya alang sa talagsaong ‘grandslam’ title sa Tanduay Athletics E-Leagues for Basketball Season 13 karong adlawa diha sa  City Sports Club-Cebu gym.

Ang Converters makigharong batok sa Teletech-Telstra Boomerangs sa main game sa alas-4:30 sa hapon, samtang ang Contact Solutions Flying Lemurs makig-atbang sa Tech Mahindra Tech Mighties sa pasiunang duwa sa alas-3 sa hapon.

Ang Converters masaligon sa ilang tsansa nga makadaog sa ikatulo nilang sagunson nga kampiyonato, butang nga wala pa’y team nga nakahimo sukad   matukod ang liga niadtong 2004.

Dili hinuon sayon nga dalan ang agian sa Convergys gumikan kay lig-on man ang ilang makasangka, apil na ang Supportsave Dragons  nga gisaka ngadto sa Elite Classic human nanghawod sa Evo League sa miaging season nga wa’y pilde sa 16 ka duwa.

Lain pang lig-on nga ikabangga sa Convergys mao ang Lexmark Stallions, Teleperformance All-Stars, SSI Warriors, Accenture Sharks, Wipro Tigers, ePerformax Reds ug Sykes Pioneers.

Sa Evo League, magtige sa titulo mao ang Tech Mahindra, Dyninno Jets (kanhi Raptors), Author Solutions Inc. Hardbacks, The Results Spartans, Teletech Titans, QBE Generals ug Optum Knights (kanhi United Health Group Cobras).

Naglaraw nga mosurprisa kanila mao ang bag-ong mga entrante nga mao ang Streamline Kangaroos ug Shearwater Health Crusaders. (BANAT NEWS)