Mary Joy Tabal nakakuha og suporta
CEBU, Philippines - Daghan ang wala kauyon sa desisyon sa Philippine Amateur Track and Field Association (PATAFA) ubos sa liderato ni Philip Ella Juico ang pagtangtang ni Cebuana marathon queen Mary Joy Tabal sa Phl team nga moduwa sa Southeast Asian Games sa Agosto.
Gumikan niini, daghan ang mipadayag sa ilang suporta ngadto ni Tabal ug usa na niini si Philippine Sports commissioner Ramon S. Fernandez nga misaad nga buhaton niya ang tanan aron mabalik si Tabal sa nasudnong koponan.
“This is the second time that she (Tabal) is writing for a reinstatement at the same time we are preparing for our next move,” matud pa ni Fernandez atol sa tigum uban ni Tabal, Cebu City Mayor Tomas Osmeña, deputy mayor for sports Jun Gabuya ug Jerry Guardo ug sports commissioner Allan Borres Delantar didto sa Mayor’s office kagahapon.
Ang PATAFA mitangtang ni Tabal kay matud nakalapas kini sa panginahanglanon ug kondisyon sa organisasyon. Kini bisan pa og kapila na gipamatud-an ni Tabal nga siya ang numero unong babayeng marathoner sa nasud.
“It's unfair. It’s not fair just because Mary Joy doesn’t want to go to Manila for training. The athlete wants to train here in Cebu because she’s comfortable here," matud pa ni Delantar. “Ilang gusto adto sa Manila mag-training but dili man comfortable si Mary Joy."
Si Osmeña sa iyang bahin, miingon nga suportahan niya si Tabal, kinsa mihimo og kasaysayan isip labing unang Pinay’ng atleta nga midagan sa Olympic marathon niadtong miaging tuig sa Rio de Janiero, Brazil.
Sa linain nga press conference kagahapon didto sa Casino Español de Cebu, si Tabal emosyonal nga naglaum nga magkasinabot na ang isi’g habig ug mahatagan na siya og kahigayonan nga makaduwa sa SEA Games didto sa Malaysia. (BANAT NEWS)
- Latest
