Roach nabalaka, Pacquiao mibahar

CEBU, Philippines - Gibati og tumang kabalaka si Hall of Fame trainer Freddie Roach  sa naobserbahan niyang pagbahar ni Manny Pacquiao atol sa ilang sparring session nga iyang gihulagway maoy labing bati niyang nakita sa iyang boksingero sukad masukad sa usa ka training camp.

Wa’y lipud-lipud nga giangkon ni Roach nga dili maayo ang dagan sa ikaduhang adlaw sa ilang sparring didto sa Elorde Gym sa Mall of Asia complex sa Pasay City. Gawas nga wala mobanat segun sa naandan niyang buhaton, wala sab sa sakto nga tayming ang Pinoy’ng senador.

Naalarma man tuod si Roach, apan malaumon siya nga makabawi ra unya ang eight-division world champion ilabi na sa naghinangat nga bahin sa ilang away ni Jeff Horn.

Si Pacquiao gikatakda nga modepensa sa iyang WBO welterweight title batok sa wa’y pildeng Australyano karong Hulyo 2 didto sa Suncorp Stadium sa Brisbane, Australia.

Sa sayo pa, si Roach misalig nga palukapahon ni Pacquiao si Horn, apan nagduha-duha na siya karon paghimo og prediksyon gumikan sa dili maayong salida sa iyang boksidor nga maora’g gitay-an ning higayona. (BANAT NEWS)