Melindo mobida sa Pinoy Pride 39
CEBU, Philippines - Ang batos sa ALA Boxing Gym nga si Milan Melindo moaway alang sa interim IBF light flyweight title batok ni veteran Thai champ Fahlan Sakkeerin sa main event sa Pinoy Pride 39 sa ALA Promotions ug ABS-CBN karong Nobiyembre 29 diha sa Cebu Coliseum.
Mao kini ang gibutyag ni ALA Promotions President Michael P. Aldeguer ngadto ni Dong Secuya sa Philboxing.
Ang IBF mimando sa away nilang Melindo ug Sakkeerin sa miaging bulan human ang Hapon nga kampiyon nga si Akira Yaegashi dili makadepensa sa iyang bakus batok ni Melindo kay naangol.
Si Melindo dunay rekord nga 34-2 uban ang 12KOs, samtang si Sakkeerin may rekord nga 31-4-1, 16KOs.
Duha na ka higayon nga miaway si Melindo alang sa world title, apan pakyas siya.
Nahagba siya pinaagi sa unanimous decision batok ni WBO/WBA champion Juan Francisco Estrada niadtong Hulyo 27, 2013 didto sa Macau ug napukan sab pinaagi sa controversial 6th round technical decision batok ni IBF champion Javier Mendoza niadtong Mayo 30 sa miaging tuig didto sa Mexico. (BANAT NEWS)
- Latest