TNT KaTropa, Meralco Bolts sugod na sa ilang “best-of-five” semis

CEBU, Philippines - Managsuong koponan, TNT KaTropa ug Meralco Bolts ang mag-unay og away alang sa pagsugod sa 2016 PBA Governors’ Cup “best-of-five” semifinals series karong gabii didto sa Smart Araneta Coliseum.

Ang KaTropa mao ang numero unong title contender karon nga conference human gitapos ang elimination round nga usa lang ang pilde. Apan si TNT coach Jong Uichico nagkanayon nga gitan-aw nila nga usa ka dakung babag sa ilang plano nga mosulod sa finals ang Meralco ni coach Norman Black.

Ang Meralco maoy katapusang koponan nga miabante sa Final Four human nila gipilde ang Mahindra Enforcer, ang koponan nga mipahamtang og bugtong pilde sa   TNT  atol sa eliminasyon.

Bantayanan sa KaTropa sa ilang serye ang veteran import nga si Allen Durham, ang numero unong yawi sa kalampusan sa Bolts. Atngan usab ang pakigharong ni Jimmy Alapag sa karaan niyang koponan nga TNT. (BANAT NEWS)