CESAFI swim records nangabuak
CEBU, Philippines - Si Maria Aaliyah Suarez Biagan misalida og maayo sa dihang gidominar sa University of San Carlos ang swimming event sa 2016 Cebu Schools Athletic Foundation, Inc. (CESAFI) season didto sa Cebu City Sports Center kagahapon.
Si Biagan miposte og oras nga 1:25.10 aron pagkadlit og record sa 100m breast stroke ug ingon man sa 200m breast stroke sa oras nga 3:03.72.
Ang iyang teammate nga si Ruliben Deligero milansang sab og bag-ong marka sa 100m breast stroke sa oras nga 1:14.31 clocking, samtang ang USC boys miinat sa kaugalingon nilang record sa 4x100m medley relay gikan sa 4:49.97 ngadto sa 4:48.85.
Sa kinatibuk-an, ang USC mitapos lamang ikatulo ngadto sa University of Cebu nga maoy naghawod sa secondary division human mihakot og walo ka golds, pito ka silvers ug siyam ka bronze. Ang UC mikabkab og 14 golds, 19 silvers ug 5 bronzes.
Hinoon ang Carolinians maoy milangkat sa kampiyonato sa tertiary division sa natangag niining 28 ka golds, 25 ka silver ug 12 ka bronze medals. Nagsunod ang UC nga dunay 6-8-11 g-s-b tally ug dayon ang University of the Visayas nga miangkon og tulo ka golds, usa ka silver ug lima ka bronze.
Si Karen Mae Indaya sa UC mitala og record sa 100m backstroke sa oras nga 1:16.66 ug ingon man ang UC boys ug girls 4x50m medley relay teams sa oras nga 2:06.84 ug 2:12.03.
Samtang si Johann Matthew Tubesa sa Sacred Heart School-Ateneo de Cebu mipatik og 100m freestyle record sa oras nga 58.25 ug usab sa 50m freestyle sa oras nga 26.15. Ang Ateneans mitapos sa ikaduhang dapit sa secondary level uban sa ilang walo ka gold, pito ka silver ug siyam ka bronze. (EBV)(FREEMAN)
- Latest
