Napakgang na gyud

CEBU, Philippines - Gipakita sa Mahindra Enforcer nga tinuoray sila nga usa ka contender  sa PBA Governors’ Cup human nila giputol ang nagkutay nga daog sa TNT KaTropa, 107-104 kagabii didto sa Smart Araneta Coliseum.

Sila sab ang koponan  nga mipahamtang sa labing unang kapildihan sa KaTropa.

Ang Enforcer mipalig-on sa ilang kupot sa solong No. 2 seed sa ilang 6-2 win-loss record.

Bisan pa sa kapildihan sa TNT  nagpabilin gihapon sila sa  unang dapit sa standing uban ang 6-1 nga baraha.

Balanseng ataki ang gigamit sa Mahindra aron pagpakgang sa winning-streak sa TNT.       Nangulo sa koponan ni playing coach Manny Pacquiao mao ang  import niining si James White kinsa mikadlit    og 24 puntos ug milangkat og 10 ka rebounds.

Nakakuha sab og igong suporta si White gikan sa mga lokal nga mihimo og double-digits sama sa rookie nga si Paolo Taha kinsa mikamada og 15 puntos,   KG Canaleta  nga miratsada og 13 puntos, LA Revilla  sa iyang 12 puntos ug Mike Digregorio nga adunay 11 puntos.

Ang Mahindra abante og siyete puntos    paghuman sa unang duha ka kuwarter, 51-44, apan nakahigayon pagsikit ang  KaTropa, 71-72  sa nahabiling 5:54 sa third period pinaagi sa mainiton nilang rally sa pagpangulo nilang Jayson Castro ug Troy Rosario.

Apan wala kalahutay ang rally sa TNT tungod  kay wala nila mahatagi og solusyon sa depensa sila si Revilla ug Digregorio nga mipauwan og mga puntos nga maoy mihatag kanila og komportabling 85-77 nga labaw sa katapusang siyete minutos sa duwa.

Nakalabaw unta ang  KaTropa sa iskor nga 72-71 sa nahabiling 1:07 sa  itsa ni Jeth Troy Rosario, apan gibawsan sab dayon og tres ni Chito Jaime  aron hatagan ang  Mahindra og 74-72 nga labaw ug sukad niadto kontrolado sa Enforcer ang duwa.

Si Jason miburak og 33 puntos aron pangulohan ang  TNT,  samtang   ang import nilang si Mychal Ammons mitampo og 20 puntos. (BANAT PALARO)