DBTC Greywolves, 4-0 na sa CESAFI
CEBU, Philippines - Padayon nga nagmangtas ang Don Bosco Technological Center (DBTC) Greywolves ug ang katapusan nilang gisungag mao ang Southwestern University (SWU) Baby Cobras, 83-74 aron pag-inat sa labing nindot nilang sinugdanan ngadto sa 4-0 sa 16th Cebu Schools Athletic Foundation, Inc. (CESAFI) men’s basketball tournament kagabii didto sa Cebu Coliseum.
Si Grenal Malubay mitali og 17 puntos, samtang sila si Jomari Ranuco, JB Damolo ug Ken Gato nagkumboya’g 44 puntos sa Greywolves nga mao na lang karon ang nagpabiling wa’y pildeng koponan sa juniors division.
Miduwa nga taas og kompiyansa, ang Greywolves miarangkada dayon pagsugod sa duwa aron pagposte og 13 puntos nga bentaha, 33-20 sa nahabilin nga 4:37 sa ikaduhang kuwarter.
Ang Baby Cobras nakasikit ngadto na lang sa uno punto, 34-35, apan ang Greywolves milusad og 22-2 nga rally aron pagposte og 21 puntos nga labaw, 57-36 sa tunga-tungang bahin sa ikatulong kuwarter.
Pabiling nakigbisog ang Baby Cobras aron mopaduol pag-usab sa iskor nga 65-70, apan mao na kadto ang katapusan nilang utong gumikan kay ang Greywolves milusad og 12-5 run aron pagselyado sa ilang kadaugan. (BANAT NEWS)
- Latest