Olympic Silver Medalist Diaz mobisita sa Sugbo
CEBU, Philippines - Ang Rio Olympic silver medalist sa weightlifting nga si Hidilyn Diaz gitakda nga moanhi sa Sugbo isip speaker sa “The Process of Building Olympians” nga gipasiugdahan sa Epic Performance Fitness sa Septiyembre 4 diha sa City Sports Club Cebu.
Si Diaz maoy bugtong mitunol og medalya sa Pilipinas sa Rio 2016 Olympic Games. Ang iyang silver medal mao ang labing unang medalya sa nasud sukad ni Mansueto ‘Onyok’ Velasco nga nidaog og silver sa boksing atol sa 1996 Atlanta Olympics.
Ang 25-anyos nga si Diaz gipaabot mopaambit sa iyang kasinatian isip usa ka Olympic weightlifter.
Uban niya ang laing Olympian nga si Charly Suarez sa boksing. Si Suarez nag-ensayo ubos sa giya ni Epic Performance coach Pio Solon, samtang si Diaz miensayo ubos sa higala ni Solon nga si Jay Futalan, kinsa mao ang head strength and conditioning coach sa Philippine Sports Commission (PSC).
Si Futalan gipaabot usab nga mohatag og tambag sa mga motambong sa maong seminar.
Ang registration fee nagkantidad og P1,000 ug P7,000 alang sa mga estudyante libre na ang certificate of participation ug meal. Ang maong kalihukan limitado lang ngadto sa 300 ka slots. (BANAT NEWS)
- Latest
