HLY kampiyon sa Power Forty President’s cup 2016

CEBU, Philippines - Bisan pa sa taliwala sa kalisud, ang HLY milampos gihapon paglangkat sa korona sa Power Forty Basketball Tournament 2016 President’s Cup.
Ang HLY ni playing team manager Atty. Flor Yosores nakaeskapo bitbit ang 80-78 nga kadaugan batok sa AMBL sa  finals niadtong Miyerkules sa gabii didto sa Pardo Sports Complex, siyudad sa Sugbo.

Si Nando Sumargo maoy nakapadaog sa HLY pinaagi sa iyang running shot sa daginutong segundos sa duwa. Gawas sa iyang pagkamabayanihon, si Sumargo mao sab ang nangu sa scoring sa HLY nga mikamada’g 25 puntos.
Ang kadaugan magsilbe sab nga bawos sa HLY ngadto sa AMBL nga mipilde kanila atol sa elimination, 79-90 niadtong Hunyo 7.

Wala sab kapugngi si    Eric Espinosa  nga mihirit og 13 puntos ug ingon man si Alex Mercado nga mitimang og 10 puntos alang sa nagbagang opensa sa  HLY.
Ang AMBL ni Alan Lim labaw sa halftime, 48-42 sa duo nilang Robert Abasolo ug Glen Birao. Apan  nahimong kulbahinam ang duwa dihang nakaigwalis ang HLY, 78-all sa nahabiling 10 segundos sa fourth quarter.

May purohan unta nga modaog ang AMBL o di ba mahatod ang duwa sa overtime, apan si Abasolo nga mo-penetrate na unta nakatamak sa linya nga nakapabuhi sa dugo sa HLY.
Sa ball possession sa HLY, si Sumargo mibuhi sa iyang marka bahala nga running shot nga maoy mipadaog sa koponan.
Si Abasolo mikadlit og 37 puntos, samtang si Birao mikulit og 13 puntos sa AMBL.
 

Ang liga  nahimong posible tungod sa  paningkamot ni Lando ‘El Presidente’ Almojallas ug sa tanang sakop sa maong ballclub.
Matud pa ni league commissioner Edwin Dejacto Sr. nga ang awarding himuon karong buntag dungan usab sa kasaulogan sa pagtimaan sa ika-28 nga anibersaryo sa Power Forty ballclub diha sa Inayawan Sports  Complex.
Apan sa dili pa ang awarding, adunay pagahimuon nga exhibition game sa 60-above veterans nga gikatakda sa alas-9 sa buntag. (BANAT PALARO)